ანალიტიკოსი, ზურაბ ბატიაშვილი:
იუსუფელიდან ბოლო ამ ქალაქის გამორჩეული კოლორიტი ყასაბი სეზაი გავიდა, რომელიც ახალგაზრდობაში საოცრად გავდა ქართველ ფეხბურთელ ალესანდრე ჩივაძეს.
მიუხედავად იმისა, რომ ქალაქის მოსახლეობის უმრავლესობისგან განსხვავებით პოლიტიკურად მემარცხენე ორიენტაციის იყო, იგი ყველას თანაბრად უყვარდა.
თუ რამე სასაცილო ხდებოდა ქალაქში, ყველა იძახდა, ამ საქმეში ნამდვილად სეზაის ხელი ურევიაო.
მართლაც ასე იყო. ერთხელ ადგილობრივ მოლასთან გამოცხადდა და სთხოვა თავისი მეგობრის ოსმანის მოსახსენიებელი ლოცვა წაეკითხა.
მოლამ მისი ეს თხოვნა პირნათლად შეასრულა და ხმისგამაძლიერებლებით მთელ ქალაქს ამცნო ოსმანის “გარდაცვალების” ამბავი.
ნაცნობ-მეგობრებმა ოსმანი გამოიტირეს. ამ დროს კი ოსმანი ჩაიხანაში იჯდა და ჩაის მიირთმევდა, თან გაოგნებული აქეთ-იქით იყურებოდა და კითხულობდა, მე მოვკვდიო? 
მანამდე კი მემარჯვენე-მემარცხენეების სასიკვდილო დაპირისპირება რომ იყო 1970-იანი წლების ბოლოს თურქეთში, სეზაიმ მემარჯვენე ორიენტაციის პატივცემული თევფიქი დაპატიჟა ქალაქის ცენტრში ჩაიზე.
ბევრი ჩაი ასვა, მაგრამ თევფიქი ტუალეტში არ შედიოდა, რაც სეზაის გეგმის განხორცილებას ხელს უშლიდა. მაშინ სეზაიმ, მორიგი ჩაი როცა შემოიტანეს, თევფიქის ჭიქაში მოხერხებულად ჩაყარა კუჭში გახსნის საშუალება.
მაშინ კი იკადრა თევფიქმა ტუალეტისკენ გაქანება. მაგრამ შევარდა თუ არა, სეზაიმ წინასწარ მომზადებული მოლოტოვის კოქტეილის იმიტაცია მიაყოლა უკან და გამოვარდა ეს პატივცემული თევფიქი ჩახდილ მდგომარეობაში შუა იუსუფელში.
მაგრამ ამბავი აქ არ დასრულებულა. სეზაიმ გარეთ გამოვარდნილ თევფიქს ოსმანი დაახვედრა, ვისზეც ზევით ვისაუბრეთ. მაშინ ოსმანი ჟურნალისტობდა და გარეთ გამოვარდნილ თევფიქს მიკროფონი გაუწოდა, ვინ დაგესხათ თავსო.
თევფიქმაც სწრაფად ვერ აუღო ალღო შექმნილ სიტუაციას (მაშინ მართლაც ხშირი იყო თავდასხმები პოლიტიკური ორიენტაციის გამო) და ნახევრად ჩახდილ მდგომარეობაში მთელი სერიოზულობით ყვებოდა, მემარცხენეები დამესხნენ თავსო.
დღეს 71 წლის სეზაიმ მთელი თავისი ქონება ორ ჩანთაში ჩატია და ბოლო გავიდა უკვე წყალში ჩაძირული იუსუფელიდან.
რამდენი ასეთი ამბავი და მოგონება ჩაიძირა ამ ქალაქში…
Nusret Durur
კომენტარები