„მთავარია, ბიძინა და მისი კლანი იყვნენ კარგად და რაც შეიძლება მეტი ფული იშოვნონ ამ ქვეყნისა და ჩვენი ხალხის ხარჯზე, დანარჩენი წყალსაც წაუღია!“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.  

– რუსეთი ბიჭვინთის ანექსიას ახდენს და ეს რომ ანექსიაა და არა სხვა რამ, ამას აფხაზეთის დე ფაქტო პარლამენტის წევრებიც კი აცხადებენ. ამ დროს, ირაკლი ღარიბაშვილმა პოლიტიკოსებს მოგიწოდათ, ზედმეტი აჟიოტაჟი არ ატეხოთ ამ საკითხზეო. გააპროტესტონ მაინც, ერთი განცხადება გააკეთონ და დაგმონ რუსეთი ქმედება? ასე ეშინიათ, რომ კრინტს ვერ ძრავენ?

– კი, ძალიან ეშინიათ რუსეთისა. ეს არის „ქართული ოცნების“ პოლიტიკა. რაც არ უნდა მოხდეს, არაფერზე უნდა ვილაპარაკოთ. მხოლოდ ის უნდა ვილაპარაკოთ, რა კარგია, რა ბედნიერები ვართ, რომ ივანიშვილი არაფორმალურად გვმართავს. საქართველოს ოკუპირებული ტერიტორიებიც წყალს წაუღია, საქართველოც დაცლილა თუნდაც ერთ დღეში, საერთოდ, გადავგვარებულვართ, არ აინტერესებთ… ხმა არაფერზე უნდა ამოვიღოთ. თუ ვინმე რაიმეს გააპროტესტებს, „ნაციონალია“. მთავარია, ბიძინა და მისი კლანი იყვნენ კარგად და რაც შეიძლება მეტი ფული იშოვნონ ამ ქვეყნისა და ჩვენი ხალხის  ხარჯზე, დანარჩენი წყალსაც წაუღია, მეტი არაფერი აინტერესებთ. რა განასხვავებს ღირსეულ ერს უღირსისგან? ღირსების ქონა. ესენი მიგვაქანებენ იქითკენ, უნდათ, ღირსება აგვყარონ, უღირსებო ერად გვაქციონ. ეს არ გამოუვათ, გამორიცხულია. ჩვენი ყოველი გოჯი მიწისა გაცილებით მეტია ღირებულებით, ვიდრე ნებისმიერი ივანიშვილები ერთად აღებული.