მსახიობს, სტიქაროსანსა და ტელეკომპანია „ერთსულოვნების“ თანამშრომელს, კახა მიქიაშვილს კორონავირუსი დაუდგინდა.
როგორც თავად კახა მიქიაშვილი აცხადებს, მეგობრისთვის ვირუსის დადგენის შემდეგ, არც მსახურებაზე და არც საპატრიარქოს ტელევიზიაში არ მისულა და მისგან ვირუსი არავის გადასდებია.
„ვირუსი 1-ელ ოქტომბერს დამიდასტურდა. წყარო ვიცი. ჩემმა მეგობარმა გადამდო, რომელიც აქვე, ორი პალატის იქითაა მოთავსებული. მას შემდეგ, რაც მას დაუდასტურდა და მითხრა, ვიყავი ჯერ თვითიზოლაციაში, სახლში, შემდეგ – სასტუმროში და სასტუმროში გამომივლინდა სიმპტომები. ახლა ვარ ბოჭორიშვილის კლინიკაში. ვითვლები სტაბილურ პაციენტად. თავიდან უფრო კარგად ვგრძნობდი თავს, მაგრამ გუშინ ორივე ფილტვზე აღმომაჩნდა პნევმონია და გააგრძელეს მკურნალობის ახალი ეტაპი. მადლობა ღმერთს, რაც მადარდებდა, არ ახდა და ჩემგან არავის გადასდებია, რადგან იზოლაციაში ვიყავი და კონტაქტები არ მქონია“ – აცხადებს კახა მიქიაშვილი.
„ქრონიკასთან“ საუბრისას, მან დაავდების სიმპტომებსა და მიმდინარეობაზეც ისაუბრა.
„პირველ დღეს მქონდა მაღალი სიცხე და თავის ძლიერი ტკივილი. მას შემდეგ, რაც გადმომიყვანეს კლინიკაში, სადაც შესანიშნავი პერსონალია და დიდ ყურადღებას იჩენენ, რამდენიმე დღე ვიყავი შესანიშნავად, შემდეგ, ერთი დღე მქონდა მაღალი სიცხე და მას შემდეგ, გუშინდელ, მეცხრე დღემდე, სერიოზული არაფერი მქონია. მეცხრე დღეს აღმოჩნდა, რომ დაწყებული მაქვს ანთება. ახლა ცოტა უფრო სუსტად ვარ, შესაძლოა ანტიბიოტიკების, შესაძლოა, პნევმონიის ფონზე, მაგრამ, ჯერჯერობით, სუნთქვის გაუარესება არ მაქვს. სტაბილურად, ნორმალურად ვგრძნობ თავს“ – განაცხადა კახა მიქიაშვილმა.
მისივე განცხადებით, მას შემდეგ, რაც მეგობრის ინფიცირების შესახებ გაიგო, საქართველოს კათოლიკოს-პატრიარქთან არანაირი კონტაქტი არ ჰქონია.
კომენტარები