“მოვა რამდენიმე ასეული, ბევრი არა… თუ არ დაეტევიან ეზოში არ შემოვუშვებთ” – რა ხდება ჯაფარიძის პროცესის დაწყებამდე?

თბილისის საქალაქო სასამართლოსთან, სადაც მალე ზურაბ ჯაფარიძის პროცესი დაიწყება, ამ წუთებში, გომელაურის პოლიციის უპრეცედენტო მობილიზებაა.

ადგილზე სამართალდამცველები მიკროავტობუსებით მიიყვანეს.

გოგა მემანიშვილი ამბობს, რომ მართალია, ჯერ არაა ხალხი შეკრებილი, მაგრამ იცის, ინფორმაცია აქვს, რომ მივლენ, ასევე ამბობს, რომ ბევრი არ მივა, ასე რამდენიმე ასეული. რამდენია გოგა მემანიშვილისთვის ბევრი, უცნობია.

“ის რაოდენობაა, რაც დასჭირდება საზოგადოებრივ წესრიგს…რამდენიმე ავტობუსით გვყავს მოყვანილი”- ამბობს გოგა მემანიშვილი ტვ პირველთან.

ერთ–ერთი მაღალჩინოსანი შსს–დან ამბობს, რომ 300–ზე მეტი პოლიციელი შეიძლება იყოს მობილიზებული.

კიდევ ერთი წარმომადგენელი შსს–დან ამბობს, რომ თუ სასამართლოში არ დაეტევიან, სასამართლოს ეზოში არ შეუშვებენ, საიდან იციან რამდენი დაეტევა დარბაზში და ან რატომ არ შეიძლება ეზოში დგომა, არ იცის, თუმცა, სასამართლოს ჭიშკარი უკვე დაკეტილია.

წულუკიანის ე.წ. კომისიაზე გამოუცხადებლობის გამო, ზურაბ გირჩი ჯაფარიძეს  20 000-ლარიანი გირაო 16 აპრილს შეუფარდა. მისი სასამართლო პროცესი დღეს, 15:00 საათზეა ჩანიშნული. მოსამართლე დიდი ალბათობით, აღკვეთის ღონისძიების შეცვლაზე იმსჯელებს.

საქმის განხილვის პარალელურად, საქალაქო სასამართლოს ეზოში მისი მხარდამჭერების შეკრებაა დაანონსებული.