საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
19 იანვრის შეჯამება უკრაინაში:
– დასავლეთში ომის რაც შეიძლება მალე დასრულება სურთ და უეჭველად რუსეთის მარცხით. სწორედ ამ ფონზე ბოლო ერთი კვირაა გაერთგვაროვანდა ის სიგნალები რომელიც დასავლეთიდან მოდის – რომ არ ეშინია დასავლეთს რუსეთის და რომ ომი როდემდეც არ უნდა გაგრძელდეს დასავლეთი დაუდგება უკრაინას, როგორც ნატოს დეფაქტო წევრს და აგრესორს დაამარცხებს. მსგავსი ღია განცხადებები ბოლო 48 საათში გაკეთდა დიდი ბრიტანეთის, ნორვეგიის, ფინეთის, პოლონეთის, აშშ-ს, ესტონეთის, ლიეტუვას, ლატვიისა და სხვა ქვეყნების მხრიდან.
რუსეთის ომში მარცხი საქართველოს სახელმწიფოს სტრატეგიულ ინტერესებშია. მოქმედ რეალობაში საქართველოს სახელმწიფოებრიობისა და ტერიტორიული მთლიანობის უმთავრესი მეტოქის მარცხი ახალ შესაძლებლობებს გულისხმობს, მათ შორის ტერიტორიების დაბრუნებასთან და ახალ ეკონომიკურ, პოლიტიკურ თუ სამხედრო ალიანსებში გაწევრიანებასთან მიმართებით. დიდ გეოპოლიტიკურ ძვრებს საქართველო მომზადებული უნდა შეხვდეს – ისტორიის გადმოსახედიდან კითხვის ნიშნები არ უნდა არსებობდეს თუ სად დგას ჩვენი სახელმწიფო (რომლის ოფიციალურ პოლიტიკასაც ხელისუფლება ქმნის). როდესაც ხელისუფლებას ლავროვი კარგი საქციელისათვის აქებს იქ რაღაც ვერ არის კარგად. ომის დროს საქართველოს ხელისუფლება ქვეყნის მოკავშირეებს აკრიტიკებს (რბილად რომ ვთქვათ), მაგრამ რუსეთთან მიმართებით დადუმებულია. ფრენების აღდგენის იდეას სიხარულით არ უნდა ხვდებოდნენ და ეკონომიკის რუსეთზე ჩამოკიდებას არ უნდა ეგებებოდნენ. გარდა იმისა, რომ მტრის მხარეს რაციონალურ-მორალური მიზეზებით არ უნდა ვიდგეთ, დამარცხებისა და დაღმასვლისაკენ მიმავალი აგრესორი მტრის მხარეს [თუნდაც ფარული] ყოფნა კიდევ უარესია. სიფრთხილე აუცილებელია, მაგრამ სიფრთხილე რუსეთთან მიტმასნებას არ გულისხმობს.
– უკრაინის დასახმარებლად შვედეთმა 12 Archer თვითმავალი, ავტომატიზებული საარტილერიო სისტემა გამოყო. ასეთი სულ 48 არის აგებული. შესაბამისად, საკმაოდ დიდ კონტრიბუციაზეა საუბარი. Archer-ს მოწინააღმდეგის განადგურება სტანდარტული ჭურვით 30 კილომეტრზე შეუძლია, “ექსკალიბურით” კი 50 კილომეტრზე. მაგრამ აქ საარტილერიო სისტემის სისწრაფეა გასათვალისწინებელი – გაჩერებიდან 30 წამში შეუძლია ზუსტი დამიზნება და გასროლა, მეორე 30 წამში კი იმ მდგომარეობაში დაბრუნება, რომლიდანაც გადაადგილებას დაიწყებს.
შვედეთმა გამოყო 50 CV90 შეჯავშნილი საბრძოლო მანქანა, რომლის უკანასკნელი მოდიფიკაციაც მოწინააღმდეგის ჯავშანსაც კი ადვილად დაარღვევს.
დამატებითი საარტილერიო სისტემები იგზავნება ესტონეთიდანაც ისევე როგორც თავიანთი მთლიანი შიდა პროდუქტის 1.1%, ხოლო დანია თავის ხელთ არსებულ ყველა CAESAR-ს აგზავნის, რომლის რაოდენობაც 19-ია. CAESAR ფრანგული წარმოების თვითმავალი საარტილერიო სისტემაა.
ამას ემატება საკმაოდ მოულოდნელი ამბავი, რომელიც Visegrád 24-მა სერბულ მედიაზე დაყრდნობით გაავრცელა – სერბეთი, რუსეთთან თბილი ურთიერთობის მქონე სახელმწიფო, უკრაინას ენერგოსისტემის უსაფრთხოებაში დაეხმარება. სერბეთი ევროკავშირთან კარგი ურთიერთობის განვითარებას და კოსოვოს საკითხის თავის სასარგებლოდ წამოწევას ცდილობს ისევე როგორც ევროკავშირის წევრობაზე მოლაპარაკების დაწყებას, რომელსაც კანდიდატის სტატუსის მიღების შემდეგ პერიოდულად ითხოვს ხოლმე, თუმცა სერბეთის მიდგომა საკმაოდ ორაზროვანია და გრძელვადიანად იმისდა მიხედვით შეიცვლება თუ რას შეიძლება მოელოდეს რუსეთისა და ევროკავშირისაგან.
– ხვალ გერმანიაში შეხვედრაა სადაც დამატებითი შეიარაღების გადაცემაზე იმსჯელებენ. სავარაუდოა, რომ გერმანიაზე ზეწოლა გაიზრდება Leopard 2 ტანკებთან დაკავშირებით. ამ ეტაპზე გერმანია, რომელიც ეკონომიკური გიგანტია საკმაოდ კარგავს იმ რბილ ძალას, რომელიც ევროპის მასშტაბით შეიძლება ჰქონოდა. ეს კი ევროპის შიგნითაც ცვლის ძალთა ბალანსს როგორც ვარშავის ისე რომის სასარგებლოდ.
– მოსკოვში სამთავრობო შენობებზე ჰაერსაწინააღმდეგო სისტემების განთავსება დაიწყეს. ქვეყანა, რომელიც ერთი წლის წინ კიევის სამ დღეში ასაღებად ემზადებოდა ახლა მოსკოვის დაცვას ფიქრობს.
კომენტარები