ევროპარლამენტარი ნაჩო სანჩესი ოპოზიციურ პარტიებს საქართველოში ერთიანობისკენ მოუწოდებს. მისი განცხადებით, პოლიტიკურმა ძალებმა უნდა გამოიჩინონ გულუხვობა, ჩამოაყალიბონ საერთო დღის წესრიგი და საზოგადოებას შესთავაზონ ხედვა, რომელიც ქვეყანაში დემოკრატიის აღდგენას უზრუნველყოფს.
მისივე თქმით, ეს არის ამოცანა, რომლის მხარდაჭერაშიც საერთაშორისო პარტნიორებს ვალდებულება აკისრიათ.
მე, უბრალოდ, დავამატებდი მოწოდებას საქართველოში ოპოზიციური პარტიებისთვის. ისინი უნდა იყვნენ გულუხვები. მათ უნდა შექმნან დღის წესრიგი, საერთო შეთავაზება. არ ვგულისხმობ საარჩევნო კავშირებს. მათ უნდა შესთავაზონ საზოგადოებას პოლიტიკური მოცემულობა, რომ აღადგინონ დემოკრატია ქვეყანაში. ეს არის ამოცანა, რომელშიც გვაქვს ვალდებულება, რომ დავეხმაროთ ამ პარტიებს, – განაცხადა სანჩესმა.
ევროპარლამენტის საგარეო საქმეთა კომიტეტში განიხილავენ საქართველოს შესახებ ანგარიშს, რომელსაც მუდმივი მომხსენებელი რასა იუკნევიჩიენე წარადგენს. პროექტში აღნიშნულია, რომ „საქართველოში დემოკრატიული უკუსვლა კიდევ უფრო მეტად გაძლიერდა“ და საუბარია „ქართული ოცნების“ მიერ ევროკავშირის წარმომადგენლების წინააღმდეგ „სისტემატურ კამპანიაზე“. დოკუმენტი მხარს უჭერს მიზანმიმართულ სანქციებს და მიესალმება ეუთო-ს „მოსკოვის მექანიზმის“ გააქტიურებასა და დიპლომატიური/სამსახურებრივი პასპორტებისთვის უვიზო რეჟიმის შეჩერებას.
კომენტარები