მოლაპარაკების მაგიდასთან იყვნენ პარტიები, რომლებიც ამბობდნენ, რომ იმ შემთხვევაშიც კი არ აპირებდნენ პარლამენტში შესვლას, თუ ოპოზიციის ერთიანი წინადადების ოთხივე პუნქტი დაკმაყოფილდებოდა, – ამის შესახებ „მეტი თავისუფლება – გირჩის“ ლიდერმა ზურა ჯაფარიძემ „პალიტრანიუსის“ ეთერში განაცხადა.
კითხვაზე, რომელ ან რამდენ პოლიტიკური პარტიას ჰქონდა ასეთი პოზიცია, ჯაფარიძე ამბობს, რომ პროცენტს ვერ დაასახელებს, თუმცა ასეთი „რამდენიმე პარტიული ლიდერი იყო“.
„თავიდანვე, მოლაპარაკების მაგიდასთან იყვნენ პოლიტიკური პარტიები, რომლებიც ამბობდნენ, რომ იმ შემთხვევაშიც კი, თუ ოპოზიციის ერთიანი წინადადების ოთხივე პუნქტი დაკმაყოფილდებოდა, ისინი მაინც არ აპირებდნენ პარლამენტში შესვლას. ამიტომ არ მგონია, რომ შესვლა-არშესვლა იყოს მთავარი ამბავი.
პოლიტიკური კრიზისის განმუხტვა, პირველ რიგში, ნიშნავს იმას, რომ ადამიანებს, რომლებმაც ოქტომბრის არჩევნებზე მხარი დაუჭირეს ოპოზიციას და მოლოდინი ჰქონდათ, რომ ხელისუფლება შეიცვლებოდა, ამ ადამიანებმა უნდა დაინახონ ახალი იმედი და ეს ვერ მოხდება მხოლოდ იმით, რომ ოპოზიცია შევიდეს პარლამენტში. ეს არ არის ამასთან პირდაპირ კავშირში“, – განაცხადა ჯაფარიძემ.
კომენტარები