“მიუხედავად იმისა, რაც დღეს მოგვიწყვეს…” – რა “სიურპრიზი” დაახვედრეს გახარიას გორში?

პარტია საქართველოსთვის ლიდერმა გიორგი გახარიამ გორში პარტიის ოფისი გახსნა.

მან ჟურნალისტებთან თქვა, რომ პრეზენტაციის დღეს ოფისში ელექტროენერგია გამოურთეს.

გიორგი გახარია:

“ჩვენ არ ვებრძვით არავის, ჩვენ არავის წინააღმდეგ არ ვართ, ჩვენ ვიქნებით მხოლოდ და მხოლოდ საქართველოსთვის და საქართველოს მომავლისთვის, მიუხედავად იმისა, რას მოგვიგონებენ, მიუხედავად იმისა, როგორ იჭორავებენ და გაგვლანძღავენ, მიუხედავად იმისა, როგორ ჩაგვიქრობენ შუქს პრეზენტაციის დღეს, რომელიც დღეს აქ მოგვიწყვეს, მიუხედავად იმისა, რომ დაგვიხურავენ ოფისს, მიუხედავად იმისა, რომ სამსახურიდან დაითხოვენ კი არა, უბრალოდ გამოყრიან ადამიანებს, რომლებიც წლებია, საჯარო მოსამსახურეები არიან და ქვეყანას ემსახურებიან, მიუხედავად ამისა, ჩვენ გავაგრძელებთ თითოეული ჩვენი მოქალაქისა და ჩვენი ქვეყნის მსახურებას”

გახარიას პარტიამ ბათუმის რეგიონული ოფისი 14 ივნისს გახსნა, თუმცა შენობა დააცლევინეს. პარტიის აჭარის რეგიონული ხელმძღვანელი ირაკლი მიქელაძე ამბობს, რომ ოფისი მათი გუნდის მხარდამჭერისგან ჰქონდათ ნაქირავები, თუმცა ფართის მეპატრონემ პოზიცია მოულოდნელად შეიცვალა.