“მისი ცხოვრება შეიძლება მოკლე იყო, მაგრამ მისი სიმამაცე – უკვდავი!” – 25 წლის ქართველი მებრძოლი რუსმა ოკუპანტებმა მოკლეს

კახა კვეკვესკირი, სოციალურ ქსელში, ავრცელებს ფოტოებს და წერს:

ომის დაწყებიდან არცერთი წამით არ დაუხევია უკან.

მაშინ, როდესაც ბევრი სამშვიდობოს ეძებდა, მან საკუთარ ოჯახს მტკიცედ განუცხადა: “გერმანიაში რომ გავიქცე, მერე როგორ ჩავხედო ჩემს მეგობრებს თვალებში ?”.

ეს იყო ვაჟკაცის არჩევანი, რომლისთვისაც ღირსება სიცოცხლეზე მეტი აღმოჩნდა.

დედასა და მამას ტელეფონზე ამშვიდებდა – “არ ინერვიულოთ, წინა ხაზზე არ ვარ”-ო.

სინამდვილეში კი იქ იდგა, სადაც ყველაზე მეტად “ცხელოდა”.

ის იბრძოდა მტერთან პირისპირ, ყველაზე წინ, იქ, სადაც თითოეული წამი სიცოცხლესა და სიკვდილს შორის გამავალ ბეწვის ხიდზე გადიოდა.

მისი ბრძოლა მხოლოდ უკრაინის თავისუფლებისთვის არ ყოფილა.

ეს იყო ბრძოლა იმ მორალური კოდექსისთვის, რომელიც სისხლით ქართველმა მეომარმა საუკუნეების მანძილზე გამოატარა: ბრძოლა თავისუფლებისთვის, ერთგულება სამშობლოსთვის და თავგანწირვა სიმართლისთვის.

რევაზ გეგეჭკორი 25 წლის ასაკში გმირულად დაეცა ბრძოლის ველზე.

როდესაც ისტორია თავის ფურცლებზე დიდებული გმირების სახელებს ამოტვიფრავს, იქ აუცილებლად იქნება ამ ახალგაზრდა ბიჭის სახელიც.

მისი ცხოვრება შეიძლება მოკლე იყო,

მაგრამ მისი სიმამაცე – უკვდავი !

მშვიდობა და ნათელი მის სულს, ვუსამძიმრებ ჩემს ძალიან ახლობელ ოჯახს და ვუსურვებ მხნეობას !