“მიშა ახლა აბანოში ზის და ხედავს, ზოგი უკანალი როგორ შავდება და ზოგი, როგორ თეთრდება, გამოვა, თუ არა, თავის გუნდს გაცხრილავს” – ინტერვიუ სააკაშვილის გარემოცვის წევრთან

გიორგი ჯავახაძე

“ალიას” ესაუბრება მიხეილ სააკაშვილის ახლო გარემოცვის წევრი:

კულუარულად საუბრობენ იმაზე, რომ ყველაზე დიდი ფიგურა ამასობაში, ოცნების იმ ნაწილში, რომელიც ხელისუფლებაში რაღაც დოზით დარჩება, კახა კუჭავა, დიახ, კუჭავა იქნება ოცნების დარჩენილ გუნდში წამყვანი ფიგურა, იგი ერთადერთია ამ მომენტში ქართული ოცნების გუნდში, რომელსაც დასავლეთშიც და ამერიკაშიც ჰყავს მეგობრები, ამიტომაც ცდილობს ზედმეტად ბევრი სისულელე არ ისაბროს, მან იცის, რომ მომავალშიც გარანტირებული აქვს მთავრობაში ადგილი, თუ ამ პერიოდს მეტ-ნაკლებად მშვიდად გადააგორებს. თავისი ადგილი ექნება გახარიასაც. ყველა პატარა პარტიას ექნება შანსი, თქვენ წარმოიდგინეთ, დიდი შანსი ექნება შალვა ნათელაშვილსაც კი, რადგან, როცა ოცნება აღარ იქნება, ის ხალხი, რომელსაც აღარც ოცნება უნდა და არც ნაცები – ხმას სწორედ პატარა პარტიებს მისცემენ. და ე.წ. შუაშისტების რიცხვი, ოცნების მთავრობის გადადგომისთანავე გაიზრდება, პოლარიზაციის შემცირებისთანავე, ნაციონალური მოძრაობა იმაზე ნაკლებ ხმას მიიღებს, ვიდრე ახლა მიიღო – ამასთან ერთად, შემცირდება ზეწოლა, ოცნებას აღარ ექნება დაშინების ბერკეტი და ნაცებს, ჯერ კიდევ არ ექნებათ ეს ბერკეტი ხელთ ჩაგდებული, ამიტომ, პატარა პარტიები თუ ჭკვიანად მოიქცევიან, მათ რეალური შანსი აქვთ ხმები მიიღონ.

– მიშას რამდენიმე მომხრემ ღიად დაწერა, 23 ნოემბერს ღვინოს დავლევთ მიშასთან ერთადო – როგორც ჩანს, ამ გეგმის შესრულების იმედი ბევრს აქვს…

– ხო, ნუ, ზოგი 23 ნოემბერს ღვინოს დალევს და ზოგი ჩაის…

სხვათა შორის, მიშამაც კარგად იხეირა ციხეში ჯდომით, ის ახლა რეალურად აბანოში ზის და ხედავს, ზოგი უკანალი როგორ შავდება და ზოგი, როგორ თეთრდება. გამოვა, თუ არა, პირველ რიგში დროებითი მთვარობის დაკომპლექტებაში მიიღებს მონაწილეობას, მერე კი ვადამდელ არჩევნებამდე თავის გუნდს გადაახალისებს და გაცხრილავს.

ბევრი ეუბნებოდა მას, რომ ამის გაკეთება უკრაინიდან უნდა დაეწყო და ეს არ გააკეთა. მეც ვიყავი იმათ რიცხვში, არ დავმალავ, ვინც ურჩევდა, რომ გაეცხრილა ენმ – მაგრამ, ახლა რომ ვფიქრობ, მან კიდევ ერთხელ მისცა მისი გუნდის წევრებს ბოლო შანსი და ამაზე უკეთეს გარემოს ვერც კი ინატრებდა იმის გასარკვევად, ვის რა შეუძლია, ვინ რისი გამკეთებელია, ვინ უსმენს, ვინ სცემს პატივს. სხვათა შორის, ამის მერე, დიპლმატიური კორპუსიც გადახალისდება, ელჩები, რომლებიც ახლა კობახიძეს უმშვენებენ მხარს, ელჩები, რომლებმაც, პანდემიის დროს, ისარგებლეს და თავისი გავლენების გამოყენებით რიგ ბიზნესს შეუწყვეს ხელი, ელჩები, რომელთა ცოლები ოცნებას ჰყავს დასაქმებული, ქვეყანას დატოვებენ.

გთხოვთ, ბოლოს მომცემთ საშუალება იმ ვიდეოზეც ვთქვა ორი სიტყვა, რომელიც პენიტენციურმა სამსახურმა  გაავრცელა, სადაც ჩანს, რომ მიშა ძალიანაა დასუსტებული. ამ ვიდეომ უკურეაქცია გამოიწვია, ადამიანებს ეუბნებიან, რომ შიმშილობის შეწყვეტის ოქმი ვერ შეადგინეს, რადგან სპეციალურად არ დაურღვევია შიმშილობაო, მაგრამ დღეში 30 გრამ დანამატს ვაჭმევთ და ეს ქეიფიაო. ჭამონ, აბა, თავად დღეში 30 გრამი და მერე ილაპარაკონ. თუ უნდათ, 30 გრამი მწვადი ჭამონ დღეში ერთხელ და გაძლონ. რამე ადამიანური ხომ უნდა დატოვონ? უკან დასახევ ნაბიჯს არ იტოვებენ, კოალიცია გარდაუვალია და ოცნების ეს ფრთა გზას არ იტოვებს, რომ მათ ვინმემ მაინც ჩამოართვას ხელი. კობახიძე გამოდის და ამბობს, არ შიმშილობს, ჭამსო და იქვე ამატებს, მისი უფლებაა შიმშილობა და იშიმშილოს, მერე რა ვქნაო – შეიძლება ასეთი განცხადებების მერე, მას რამე შანსი ჰქონდეს?

ჩემი ინფორმაციით, „ოცნებაში“ აქტიურადაა დაწყებული საუბარი იმაზე, ხომ არ მოითხოვონ სააკაშვილის ფსიქიატრიული შემოწმება და ამისათვის ხომ არ გამოიყენონ ნიკა გვარამიას სიტყვები, რომ სააკაშვილი შიმშილობის ამდენი დღის მერე, შეიძლება ზოგჯერ არ იყოს ადეკვატური, თუმცა, „ოცნება“ ამის გაკეთებას ვერ გაბედავს. მეორეს მხრივ, რაზეც ვთქვი, არ იკადრებს, ან ვერ იზამს-თქო, ყველაფერი გააკეთეს და თავსაც ვერ დავდებ.