კრიმინალური ავტორიტეტი, ე.წ. კანონიერი ქურდი მინდია გორაძე, იგივე ლავასოღლი საქართველოშია. ამის შესახებ ინფორმაციას “შაბათის ფორმულა” ავრცელებს. ჟურნალისტური გამოძიების ავტორების ცნობით, ის უკვე რამდენიმე კვირაა, ბათუმში, კონსპირაციულ ბინაში, დაცვასთან ერთად ცხოვრობს.
გავრცელებული ინფორმაციით, რამდენიმე დღის წინ გორაძე ბათუმის თევზის ბაზარში იმყოფებოდა, ერთ-ერთ რესტორანში და მისთვის დროებით იქ მხოლოდ მომსახურე პერსონალი დარჩა.
“ფორმულას” ცნობით, მინდია ლავასოღლი, რომელიც ბოლო ოფიციალური ცნობით მინსკის საექსტრადიციო პატიმრობაში იყო, საქართველოში, წინასაარჩევნოდ, არაოფიცილური გზებით ჩამოვიდა და სიტუაციას აჭარიდან მართავს. მან საჰაერო საზღვარი სავარაუდოდ უკრაინიდან გადმოკვეთა.
მინდია გორაძეს 2016 წელს ქართულმა სასამართლომ ჯგუფური ყაჩაღობისთვის, ქურდული სამყაროს წევრობისთვისა და ძალადობისთვის 12 წელი შეუფარდა, თუმცა მაშინ სასამართლომ საქმის განხილვა 9-თვიან ვადაში ვერ დაასრულა და ლავასოღლის გათავისუფლება მოუწიათ. მან საქართველო მალევე დატოვა და თურქეთში გადავიდა.
კომენტარები