“ქედს ვიხრი ასეულობით ჩვენი თანამებრძოლის უპრეცედენტო გადაწყვეტილების წინაშე, გამოაცხადონ მასობრივი შიმშილობა” – ასე ეხმაურება საქართველოს მესამე პრეზიდენტი მიხეილ სააკაშვილი რუსთაველის გამზირზე 21 დეკემბერს გამართულ აქციასა და ნაციონალური მოძრაობის თავმჯდომარის მიერ მასობრივი შიმშილობის აქციის დაწყებას. მისი მიმართვა გორის სამხედრო ჰოსპიტლიდან გავრცელდა.
მიხეილ სააკაშვილი მადლობას უხდის აქციის მონაწილეებს და მოუწოდებს თანამებრძოლებს, ვისაც აქვს ჯანმრთელობის პრობლემა, არ ჩაერთონ შიმშილობის აქციაში.
დიდი მადლობა იმ მრავალათასიანი მიტინგის თითოეულ მონაწილეს, ვინც ამ სიცივეში და ქარში გამოვიდა ქუჩაში. ქედს ვიხრი ასეულობით ჩვენი თანამებრძოლის უპრეცედენტო გადაწყვეტილების წინაშე, გამოაცხადონ მასობრივი შიმშილობა.
ეს არის პროტესტის უკიდურესი და ძალიან მძიმე ფორმა. როგორც ერთ-ერთი ყველაზე ხანგრძლივი გამოცდილების მქონემ ამ სფეროში, მინდა ვთხოვო ყველა თანამებრძოლს, ვისაც აქვს ჯანმრთელობის პრობლემები, არ ჩაერთონ ამ აქციაში. მინდა მოვუწოდო საზოგადოებას, მოამარაგეთ მოშიმშილეები წყლით, თბილი გადასაფარებლებით, საძილე ტომრებით, ჩაით.
არ ვეთანხმები იმ ხალხს, ვინც ამბობს, რომ ეს არ არის პროტესტისთვის კარგი სეზონი. სამართლიანი პროტესტისთვის ყველა სეზონი დროული და სწორია. განსაკუთრებით დასაფასებელია სიცივეში და ზეიმების დროს. (მითუმეტეს, ბევრ ჩვენს მოქალაქეს არ ეზეიმება.)
“ნაციონალური მოძრაობა” არის გმირული ჯგუფი და ამ მსხვერპლზე მიდის მთელი საზოგადოების თავისუფლების გამო. მიხარია, რომ ამას უერთდება ბევრი არაპარტიელი.
რა თქმა უნდა, ჩვენ, ასევე გავაგრძელებთ პროტესტის სხვა ფორმებს და აქტიურად ჩავერთვებით
დიალოგში, – წერს მიხეილ სააკაშვილი.
კომენტარები