ტყიბულის მუნიციპალიტეტის სოფელ კურსებში მეწყრული ზონიდან ევაკუირებული მოსახლეობა გეოლოგიური დასკვნის მოლოდინშია. დაახლოებით 50 ოჯახი უკვე მესამე დღეა სასტუმროში ცხოვრობს და ელოდება პასუხს, შეძლებენ თუ არა საკუთარ სახლებში დაბრუნებას.
ექსპერტები ამ ეტაპზე მეწყრის განმეორებითი ჩამოწოლის საფრთხეს სწავლობენ, რის შემდეგაც გადაწყდება, რამდენად უსაფრთხოა ტერიტორიაზე დაბრუნება.
“იმდენად დაიშალა სახლები, ზოგი სულ მიწასტან არის გასწორებული, ზოგი იმდენად დაშლილია და ეზოებში ნაპრალებია, საერთოდ ვერ შევიდნენ და ვარაფერი გამოიტანეს. ღამით, 4 საათზე რითაც გამოვიდნენ, იმით არიან გამოსულები. ჯერჯერობით ვერაფერს გვეუბნებიან, იმიტომ, რომ პროცესი ნელ-ნელა კიდევ მიმდინარეობსო. ზარალს ჯერ ვერავინ დაითვლის და სავარაუდო საუბარი იყო, რომ გაგიყვანთ დროებით ქირითო, მაგრამ როდის და როგორ და რანაირად ჯერჯერობით არ ვიცით ზუსტად”, – ამბობს ადგილობრივი.
საგულისხმოა, რომ გარემოს ეროვნული სააგენტოს გეოლოგიის დეპარტამენტი ჯერ კიდევ 2024 წლის საინფორმაციო ბიულეტენში მიუთითებდა ამ ტერიტორიაზე მეწყრის შესაძლო საფრთხეზე, რომელიც საფრთხეს უქმნიდა საცხოვრებელ სახლებს, გზებსა და ინფრასტრუქტურას.
კომენტარები