“მეშინია გული არ გამისკდეს…” – რა მოხდა უკრაინაში?

საქართველოს სახელმწიფო სიმფონიური ორკესტრის მთავარი დირიჟორი, კომპოზიტორი და პიანისტი, ნიკოლოზ რაჭველი:

უკრაინაში ვარ, ჩემმა გამომწერებმა იცით, ამ ჩამოსვლაზე (სრულ მასშტაბიანი ომის დაწყებიდან 24-ე ჩამოსვლაა ჩემთვის უკვე) კიევში უკვე ჩავატარე სამი კონცერტი, მათ შორის შევასრულე ჩემი ყველაზე ბოლოს დაწერილი სიმფონიური თხზულება “ჩვენი ამბავი”, რომელიც უკრაინელმა მსმენელმა ძალიან კარგად მიიღო, შესრულების დასრულების წუთებში ორკესტრის მუსიკოსებსაც და მსმენელებსაც შევამჩნიე რომ თვალებიდან მოსდიოდათ ცრემლები… ახლა კი ლვოვში ვასრულებთ გია ყანჩელის უკანასკნელ სიმფონიურ ქმნილებას “მე არაფერი ვიცი”… შაბათსაა კონცერტი და მანამდე რეპეტიციებს გავდივართ. იმოდენა სიყვარულის გაცვლაა ჩემსა და ლვოვის ორკესტრის (INSO LVIV) მუსიკოსებს შორის, რომ მეშინია გული არ გამისკდეს… გია ყანჩელის მუსიკა აქ ისევე უსაზღვროდ უყვართ როგორც ჩვენში… საქართველო და უკრაინა არიან ყველაზე დიდი მეგობრები და ეს მეგობრობა უნდა გადავარჩინოთ! მზად ვარ ამას მივუძღვნა დარჩენილი სიცოცხლე!!!
მადლობა ღმერთს, რომ მარგუნა მისია, ვიყო ამ მეგობრობის ელჩი მაშინ, როდესაც საქართველოს პოზიციონირება მეტად გულდასაწყვეტია პოლიტიკურ კონტექსტში. ვიცი, რომ ჩემი ერი მთელი გულით ლოცულობს მათი გამარჯვებისთვის და ამ ლოცვის ანარეკლი ჩამომაქვს ამ საოცარ ქვეყანაში, ამ საოცარ ხალხთან! გამარჯვება მათ და დიდება გმირებს, უკრაინელებსა და ქართველებს!
დაე ვიზეიმოთ სიკეთის უპირატესობა ბოროტებაზე, სინათლის გამარჯვება სიბნელეზე!.