“მეორე ტყუილი უკავშირდება ამერიკის პრეზიდენტ რონალდ რეიგანს” – სანაია

,,ქართულმა ოცნებამ” საქართველოში ამ ცნების დამკვიდრება აქტიურად დაიწყო. ეს არ არის ახალი მცდელობა. ამას ადრეც აკეთებდნენ, ოღონდ მხოლოდ მათ მიერ მართული ,,ექსპერტების” გამოყენებით. შესაბამისად, ეს ხმა სუსტად ისმოდა, მაგრამ მარტის აქციების შემდეგ მთელი სახელისუფლებო პროპაგანდისტული მანქანა ჩაირთო ამ ცნების დასანერგად. პარტიის თავმდომარით დაწყებულიბრიგითი ჭანჭიკით დასრულებული დაუსრულებლად იმეორებენ.

ამ მიმართულებით გააქტიურებას ორი მიზეზი აქვს.

პირველი: ახლა, როცა ლექციებზეც კი არ მიესვლებათ საქართველოს ღია ღალატის გამო, ცდილობენ საზოგადოება ფაშისტებად მონათლონ.

მეორე, უფრო საშიში : საკუთარი საზოგადოების ფაშისტებად გამოცხადება ქმნის უკიდურესად სახიფათო საფუძველს. კრემლის პროპაგანდა სწორედ ფაშისტებად და ნაცისტებად მოიხსენიებდა უკრაინელებს და ამ გზით აძლიერებდა ნიადაგს ქვეყანაში შესაჭრელად. ომის დროსაც ზუსტად ამ გზავნილებს იყენებს.

ირაკლი კობახიძე, როგორც წესი, ერთ-ერთი პირველია, ვისაც რუსული გზავნილების გამეორება აქვს დავალებული. სწორედ მან მოიხსენია ჩვენი მოსახლეობა ქსენოფობებად, როცა ხელისუფლებას სიფრთხილისკენ მოუწოდეს, ზომები მიეღო ომის ფონზე რუსეთიდან დაძრული დიდი ნაკადების გასაკონტროლებლად.

შესაბამისად, საკუთარი ხალხისთვის ფაშისტებისა და ქსენოფობების იარლიყის მიწებება მტრის მოპატიჟებაა. ეს შანტაჟია. გვეუბნებიან, თუ ჩვენ არ ვიქნებით, რუსებთან (ჩვენს პატრონებთან) მოგიწევთ ურთიერთობების გარკვევა; ჩვენ შეგვცვლით – მაშინ პუტინი დაგსჯით, თქვე ფაშისტებო, და ჩვენ ამისთვის ნიადაგს მოვამზადებთო. თქვა კიდეც ამ დღეებში კრემლმა, ივანიშვილს გაეშვით, თორემ დაგბომბავთო. დაივიწყეთ დასავლეთი, თორემ ომს დაგიწყებთო.

ამ პროპაგანდაზე დგას ივანიშვილი – ომით დაშინება. ქვეყანა მძევლად აიყვანა. საქართველოს უნიკალური შანსი აქვს, ბოლომდე ჩაეხსნას რუსეთს. ამისთვის ერთადერთი რამ სჭირდება – კარგი ხელისუფლება კი არა, არამედ ხელისუფლება, რომელიც იქნება თუნდაც ცუდი, მაგრამ არა რუსეთის მოკავშირე.

თუ თავად ხელისუფლებამ არ შემოიპატიჟა რუსი, არანაირი შანსი იმისა, რომ ამ ვითარებაში, უკრაინაში ომის ფონზე, რუსეთს დასავლეთმა საქართველოს დაპყრობის საშუალება მისცეს, არ არსებობს. ამიტომ ქვეყანაში ომის ერთადერთი პარტია არსებობს და მას ივანიშვილი ჰქვია. სწორედ ის ემუქრება, აშანტაჟებს და აშინებს ქვეყანას ომით; სწორედ ის ცდილობს რუსული კანონის მიღებას; სწორედ ის აწვევინებს თბილისის ცენტრში ევროკავშირის დროშას; სწორედ ის ეწევა რუსულ პროპაგანდას; სწორედ ის ინახავს პუტინისტურ, ექსტრემისტულ ძალებს და იყენებს ხალხის წინააღმდეგ.

,,ქართული ოცნების” ყველა ნაბიჯი მიმართულია საქართველოში რუსეთის გაძლიერებისა და საქართველოს ევროატლანტიკური არჩევანის დასუსტებისკენ.

თუ ხალხი და ხელისუფლება ერთ მხარეს იქნებოდნენ, ამას ემატება დასავლეთის მხარდაჭერა, რუსეთს არანაირი შანსი აღარ დარჩებოდა საქართველოში. ივანიშვილია ერთადერთი, ვინც ხელს უშლის საქართველოს. ამიტომ ის აუცილებლად უნდა შეიცვალოს. ხალხმა და დასავლეთმა უნდა დაძლიოს ივანიშვილი და რუსეთი.

ახლა სწორედ ომით შანტაჟის პროპაგანდაა გასანეიტრალებელი. ზუსტად ისე, როგორც რუსულ კანონთან დაკავშირებით დავანგრიეთ ოლიგარქის პროპაგანდა.

დავუბრუნდეთ ,,ლიბერალურ ფაშიზმს”.

ამ შემთხვევაშიც ზუსტად ისე მოქმედებს რუსული პროპაგანდა, როგორც რუსულ კანონთან მიმართებით.

მარცვალს იღებს დასავლური სივრციდან და მანიპულაციურად მას აქცევს დიდ ტყუილად.

თავად ტერმინი ,,ლიბერალური ფაშიზმი” სრული იდიოტობაა და მას შინაარსი არა აქვს, მაგრამ აქ მნიშვნელოვანია სხვა რამ – ამ სახელწოდებით 15 წლის წინ ერთი ამერიკელი მწერლის წიგნი გამოვიდა – შინაარსობრივად სრული ბოდვა, დაახლოებით იმ დონის, როგორიცაა ალქოჩარის ,,ლუციფერის მხილება”. სამყაროში უამრავი სიგიჟე იწერება, მაგრამ რუსეთისთვის მნიშვნელოვანია, რომ ცნება ,,ლიბერალური ფაშიზმი” და მისი წარმომავლობა ამერიკას დაუკავშიროს და თქვას, ჩვენ არ მოგვიგონია, აი, ამერიკაში თქვეს.

მეორე ტყუილი უკავშირდება ამერიკის პრეზიდენტ რონალდ რეიგანს, როცა ლიბერალიზმსა და ფაშიზმზე ლაპარაკობდა. რეიგანთან დაკავშირებით რუსებმა გააყალბეს ყველაფერი – თარიღები, გამონათქვამები, კონტექსტი. გააყალბეს აბსოლუტურად ყველაფერი და ამგვარი მანიპულაციით, შექმნეს ტყუილი, რომელსაც არაფერი აქვს საერთო რეიგანის შეხედულებებთან. ,,ქართული ოცნების” პროპაგანდამ სიტყვასიტყვით გადმოიღო რუსული ფეიკი და ახლა საქართველოს მოსახლეობის მოტყუებას ცდილობს.

რუსული (შესაბამისად, ივანიშვილის) პროპაგანდის ხელწერა იდენტურია – რუსულ კანონს არქმევენ ამერიკულს; ,,ლიბერალურ ფაშიზმზეც” იმავე ტაქტიკას მიმართავენ; რეიგანის შეხუდულებებს მანიპულაციურად იყენებენ… ასეა ყველაფერში.

,,ლიბერალურ ფაშიზმს” (ასევე ნაცისტებს, სატანისტებს) – რუსი პროპაგანდისტები აქტიურად იყენებენ უკრაინის წინააღმდეგ.”