როგორც შსს-ში აცხადებენ, ნიკა მელიას, ბაჩო დოლიძეს და ზვიად კუპრავას სამართალდამცველებისთვის წინააღმდეგობის გაწევას ედავებიან და ისინი ადმინისტრაციული წესით დააკავეს.
რაც შეეხება ირაკლი ეძგვერაძეზე მომხდარ თავდასხმას, შსს-მ გამოძიება 126-ე მუხლის პირველი პრიმა ნაწილით დაიწყო რაც ჯგუფურად ჩადენილ ძალადობას გულისხმობს.
შსს აცხადებს, რომ გლდანში, სწორედ ეძგვერაძეზე მომხდარი თავდასხმის გამოსაძიებლად მივიდნენ, და თურმე, საგამოძიებო ღონისძიებების ჩატარება არ დააცადეს ადგილზე შეკრებილებმა, მოულოდნელად წინააღმდეგობა გაუწიეს და ამიტომ დააკავეს. შსს არ აკონკრეტებს, რის გამო გაუწიეს წინააღმდეგობა, რა დროს, დაკითხვა დაიწყეს თვითმხილველების და არ დააცადეს, კრიმინალისტების ჯგუფი იყო მისული და არ შეუშვეს, სასწრაფო დახმარებით უნდოდათ ეძგვერაძის გადაყვანა და არ დააცადეს, თუ მაინც რას გულისხმობს საგამოძიებო ღონისძიებებისათვის ხელშეშლაში.
“შინაგან საქმეთა სამინისტროს თანამშრომლები გლდანში მომხდარი დაპირისპირების თაობაზე შეტყობინების მიღებისთანავე ოპერატიულად გამოცხადდნენ ადგილზე.
მომხდარ ფაქტზე გამოძიება სისხლის სამართლის კოდექსის 126-ე მუხლის პირველი პრიმა ნაწილით დაიწყო რაც ჯგუფურად ჩადენილ ძალადობას გულისხმობს.
ფაქტთან დაკავშირებით ტარდება შესაბამისი საგამოძიებო ღონისძიებები.
ადგილზე მისულ სამართალდამცველებს ადგილზე მყოფმა პირებმა წინააღმდეგობა გაუწიეს, მათ პოლიციელებს სამსახურებრივი მოვალეობის შესრულებაში ხელი შეუშალეს და სიტყვიერი და ფიზიკური შეურაცხყოფა მიაყენეს. რა დროსაც პოლიციამ 3 პირი ადმინისტრაციულ სამართალდარღვევათა კოდექსის შესაბამისად დააკავა.”
ცნობისთვის, კრიმინალისტები შემთხვევის ადგილზე, დაკავებების შემდეგ გამოჩნდნენ.
კომენტარები