"მე იმ კაცის დედა ვატირე, ვინც ბუდუ თავისი სამოქალაქო პოზიციის გამო არ ათამაშა!"; "ბუდუ გვინდაა! გვჭირდება! გვიყვარს!"

42,921

თბილისის მერის, ყოფილი ფეხბურთელის, კახა კალაძის გვერდზე, სოციალურ ქსელში, ათასობით ადამიანი, სწორედ მისგან ითხოვს პასუხს, რატომ არ ათამაშეს ბუდუ ზივზივაძე ევროპის ჩემპიონატის მეორე თამაშზე და რატომ ათამაშეს პირველ თამაშზე მხოლოდ რამდენიმე წუთით, ასევე, ითხოვენ, ზივზივაძე ათამაშონ პორტუგალიასთან მატჩში.

მართალია, კახა კალაძე, მიმართვას ავრცელებს და ამბობს, რომ ვინც ფეხბურთი ვერ ერკვევა, სიბინძურეს უვრცელებს და აბრალებს, მაგრამ თუ ამდენი ათასი ადამიანი “სიბინძურეს” იჯერებს მასზე და მერმა ისინი ვერ დაარწმუნა, თუ ამდენი ადამიანი თვლის, რომ თბილისის მერი ასეთი სიბინძურის გამკეთებელია, როგორც პოლიტიკოსისათვის, ეგაც დიდი პრობლემაა, რადგან პოლიტიკოსის ლეგიტიმაციის მთავარი წყარო, სწორედ ხალხია.

გარდა ამისა, კალაძეს აქტიურად ახსენებენ მის განცხადებას გიორგი ქოჩორაშვილზეც: “გიორგი ქოჩორაშვილი რომ დღეს ეროვნული ნაკრების წევრია, ჩემი დამსახურებაც არის” და ეკითხებიან, თუ მას არ აქვს გავლენა ნაკრებზე და თუ ვინმეს გვარის ამოღება არ შეუძლია, ჩასმა როგორღა შეუძლია. ასევე უხსენებენ სოსო ჯაჭვლიანის ბრალდებებს, რომელიც ამტკიცებდა, რომ სპორტის საქმეებში აქტიურად იყო ჩართული კალაძე და მისი კლანი და მეტიც, ცოლზე თავდასხმაშიც კი სდებდა მის კლანს ბრალს.