“სამწუხაროდ, მე დრო არ მაქვს”, – პრემიერ-მინისტრი გიორგი გახარია “სტრატეგია აღმაშენებლის” ლიდერთან და პრემიერობის კანდიდატთან, გიორგი ვაშაძესთან დებატებში არ დაჯდება.
თუმცა, როგორც მოქმედმა პრემიერმა განაცხადა, ზოგადად “ქართულ ოცნებასა” და “სტრატეგია აღმაშენებლს” შორის დებატები გაიმართება.
„საერთოდ, პოლიტიკური დებატები, მათ შორის პარტიული დებატები საარჩევნო პროცესის ერთ-ერთი უმნიშვნელოვანესი პროცესია. უნდა გავითვალისწინოთ ისიც, რომ ეს დებატები უნდა იყოს საქმიანი, შინაარსობრივი და რაც მთავარია, სიმართლეზე დაფუძნებული. აქ საუბარია პარტიულ დებატებზე, ხშირ შემთხვევაში ამისთვის, სამწუხაროდ, მე დრო არ მაქვს ფიზიკურად, თუმცა, რა თქმა უნდა, ეს დებატები შედგება. ეს არის პარტიის გადასაწყვეტი. პარტიული დებატები იქნება, მე არავისგან არასდროს გავქცეულვარ არანაირ შინაარსობრივ დისკუსიას, მითუმეტეს ამ ბატონებისგან“, – განაცხადა გახარიამ.
ცნობისთვის, საზოგადოებრივი მაუწყებელზე პოლიტიკური დებატები “ქართულ ოცნებასა” და “სტრატეგია აღმაშენებელს” შორის, 15 ოქტომბერს გაიმართება.
მოიაზრებს თუ არა გიორგი გახარია თავს “ოცნების” პარტიულ ლიდერად? ეს კითხვა დღეს განსაკუთრებით აქტუალური გახდა, ჯერ იყო და პარტიულ თანამდებობაზე მყოფი სოსო გოგაშვილს “ოცნებიდან” წასვლაზე განაცხადა, რომ არ აინტერესებს, ახლა კი ამბობს, რომ პარტიულია ეს დებატები და პარტიის წევრები მიიღებენ მონაწილეობას.
შეგახსენებთ, გახარიას “ქართული ოცნების” პარტიული სიის პირველი ნომერია – ნიშნავს თუ არა მისი დღევანდელი განცხადება იმას, რომ იგი პარტიული საქმეებისგან ხელებს დაიბანს წინასაარჩევნოდ – ეს მალე გამოჩნდება.
კომენტარები