“მათთვის მთავარია “ქართულ ოცნებას” რაიმე წარმატება არ მიეწეროს” – მაკა ბოჭორიშვილი ოპოზიციაზე

საქართველოს პარლამენტის ევროინტეგრაციის კომიტეტის თავმჯდომარე მაკა ბოჭორიშვილი ამბობს, რომ ევროკავშირში გაწევრიანების კითხვარის გადმოცემა მათი ხელისუფლებაში ყოფნის დროს მიღწეული პროგრესის შედეგია. 

“დღეს ქართული სახელმწიფოსა და მისი მმართველი გუნდის ერთმანეთისგან გასამიჯნად და ვიწრო პოლიტიკური მიზნების მისაღწევად ქვეყნის დაზიანების ნებისმიერი მცდელობა არის მავნებლობა და ქვეყნის მტრობა. ქართველი სახელმწიფოს წარმატების ფონზე ოპოზიციის დესტრუქციული ნაწილი კვლავ აგრძელებს ანტისახელისუფლებო განცხადების და ქმედებებით ქვეყნის ეროვნული ინტერესების დაზიანების მცდელობას. მათთვის მთავარია “ქართულ ოცნებას” რაიმე წარმატება არ მიეწეროს და ყველაფერს აკეთებენ იმისთვის, რომ სახელმწიფოს სწორედ ის წარმატება დააკნინონ, რაზედაც დგას ჩვენი ევროკავშირში გაწევრიანების მომავალი. ეს კი ნიშნავს, რომ ისინი ანტიქართულ და ანტიდასავლურ მიზნებს ემსახურებიან”, – თქვა ბოჭორიშვილმა.

შეგახსენებთ, რომ დღეს, 11 აპრილს, საქართველომ ევროკავშირის წევრობის კანდიდატი ქვეყნის სტატუსის მისაღებად კითხვარი ჩაიბარა. ეს დოკუმენტი ევროკავშირის კომისარმა სამეზობლო პოლიტიკისა და გაფართოების საკითხებში, ოლივერ ვარჰეიმ, საქართველოს საგარეო საქმეთა მინისტრს, ილია დარჩიაშვილს, გადასცა.