მასწავლებლებს ერთდროულად სამი საგნის გამოცდაზე გასვლა შეეძლებათ

საქართველოს განათლების, მეცნიერებისა და ახალგაზრდობის სამინისტრო მასწავლებლებისა და პედაგოგობის მსურველებისთვის ახალ შესაძლებლობას აწესებს — 2026 წლიდან ისინი ერთდროულად მაქსიმუმ სამი საგნის გამოცდაზე დარეგისტრირებას და ჩაბარებას შეძლებენ.

უწყების ინფორმაციით, სიახლე ეხება როგორც საგნობრივი კომპეტენციის გამოცდებს, ასევე უფროსი სპეციალური მასწავლებლისა და საბაზო პროფესიული უნარების ტესტირებას, რაც კანდიდატებს უფრო მოქნილ და ეფექტურ გზას აძლევს პროფესიული წინსვლისთვის.

„გადაწყვეტილება მასწავლებლის საგნობრივი კომპეტენციის სისტემურ გაძლიერებას ემსახურება. შედეგად, საგნობრივი კომპეტენციის დადასტურება უზრუნველყოფს სწავლების სტანდარტების ამაღლებას და ქმნის სამართლიან და ხარისხზე ორიენტირებულ საგანმანათლებლო გარემოს. მასწავლებლისა და მასწავლებლობის მსურველებს რეგისტრაციის გავლა ელექტრონულად, 20 აპრილის 10:00 საათიდან 6 მაისის 18:00 საათამდე შეფასებისა და გამოცდების ეროვნული ცენტრის ვებგვერდზე – online.naec.ge შეუძლიათ.

კანდიდატებმა უნდა გაითვალისწინონ, რომ ვერ აირჩევენ იმ საგნებს, რომელთა ტესტური დავალების/დავალებების შინაარსი იდენტურია (მათ შორის, თუ საგნის ტესტური დავალება/დავალებები ნათარგმნია უცხოურ ენაზე)“, – ნათქვამია ინფორმაციაში.