„მარცვლეულის დერეფნი“ რუსეთის გარეშე – უკრაინის შეთავაზება თურქეთს

უკრაინამ თურქეთს „მარცვლეულის დერეფნის“ რუსეთის გარეშე მუშაობის განახლების შეთავაზება გადასცა, – ინფორმაციას ამის შესახებ უკრაინული მედია თურქეთში უკრაინის ელჩზე, ვასილ ბოდნარზე დაყრდნობით ავრცელებს.

მედიის ცნობით, უკრაინელმა დიპლომატმა განაცხადა, რომ რუმინეთის, ბულგარეთისა და თურქეთის ტერიტორიულ წყლებში არსებულ დერეფნებში ხომალდების მიმოსვლაზე შეზღუდვები არ არის.

„თურქულ მხარეს მარცვლეულის დერეფნის რუსეთის გარეშე მოქმედების წინადადება გადავეცით. ჯერჯერობით არ არის საბოლოო დადასტურება, თუმცა, ვინაიდან ხომალდები უკვე დადიან რუმინეთის, ბულგარეთის, ასევე, თურქეთის ტერიტორიულ წყლებში და გადიან სრუტეებს შეზღუდვების გარეშე, ეს ნამდვილად რაციონალური გზაა“, – განაცხადა ელჩმა.

ელჩის ცნობითვე, ანკარასა და კიევს შორის მოლაპარაკებები შესაძლოა, უახლოეს დღეებში ან გაერო-ს გენერალური ასამბლეის ფარგლებში გაიმართოს.