NATO-ს გენერალური მდივანი, იენს სტოლტენბერგი ამბობს, რომ უკრაინაში ომი შესაძლოა, წლების განმავლობაში გაგრძელდეს, თუმცა დასავლეთმა კიევის მხარდაჭერა არ უნდა შეწყვიტოს.
“უნდა მოვემზადოთ, რომ [უკრაინაში ომი] შეიძლება წლები გაგრძელდეს. ჩვენ არ უნდა შევწყვიტოთ უკრაინის მხარდაჭერა მაშინაც კი, თუ ხარჯები მაღალია, არა მხოლოდ სამხედრო მხარდაჭერისთვის, არამედ ენერგიისა და სურსათის ფასების ზრდის გამო. ეს არ შეედრება იმ ფასს, რომელსაც უკრაინელები ყოველდღიურად თავიანთი სიცოცხლით იხდიან”, – თქვა სტოლტენბერგმა.
საკითხთან დაკავშირებით სტოლტენბერგმა გერმანულ გამოცემა Bild-თან ისაუბრა. ჟურნალისტმა სტოლტენბერგს ჰკითხა როგორი იქნება, ალიანსის მიდგომა მომავალში რუსეთთან მიმართებაში: “ივნისის ბოლოს მადრიდში ნატოს სამიტზე ახალი სტრატეგიის კონცეფცია გადაწყდება. აქამდე რუსეთი “პარტნიორად” მოიხსენიებოდა. როგორ მოიქცევა ნატო რუსეთთან მომავალში?”
სტოლტენბერგმა თქვა, რომ რუსეთი განხილული იქნება როგორც მშვიდობისა და სტაბილურობის საფრთხედ და არა როგორც ორგანიზაციის პარტნიორად:
“თუ მსოფლიო შეიცვლება, NATO-ც შეიცვლება. მსოფლიო უფრო საშიში გახდა. ჩვენ გამოვაცხადებთ, რომ რუსეთი არა პარტნიორი, არამედ საფრთხეა ჩვენი უსაფრთხოებისთვის, მშვიდობისა და სტაბილურობისთვის. დოკუმენტში პირველად ჩინეთიც გამოჩნდება, რადგან ჩინეთის აღზევება არის საფრთხე ჩვენი ინტერესებისთვის, ღირებულებებისა და უსაფრთხოებისთვის”, – თქვა სტოლტენბერგმა.
სტოლტენბერგს ჰკითხეს ბირთვული ომის საფრთხეებზეც. მისი განცხადებით, ის ამ ეტაპზე ვერ ხედავს რუსეთის მზადყოფნის მაღალ დონეს ბირთვული იარაღის გამოყენებისთვის.
კომენტარები