“ლელო” შეცდომას უშვებს, ილუზიაშია, თავისი არჩევანი აქვს და მიხედოს”

თბილისის მაჟორიტარობის ერთ-ერთი კანდიდატი „ახალი საქართველოს“ ლიდერი გიორგი ვაშაძე იქნება.

ამის შესახებ თავად ვაშაძემ პირდაპირ ეთერში განაცხადა. მისივე განმარტებით, ოპოზიციური პარტიები თბილისის მაჟორიტარობის კანდიდატებს ხვალ ან ზეგ დაასახელებენ:

„ხალხს რაც აინტერესებს, ეს არის ოპოზიციის ერთიანობა. მე პირობას ვდებ, ყველაფერს გავაკეთებ იმისათვის, რომ ოპოზიცია ერთიანი იყოს.

ხვალ ან მაქსიმუმ ზეგ გარკვეული კანდიდატები დასახელდება თბილისთან მიმართებაში.

ბევრს უნდოდა, რომ ჩაშლილიყო ეს შეთანხმება, „ქართული ოცნება“ ალბათ, ხელებს იფშვნეტდა, რომ იქნებ, ოპოზიციური გაერთიანება ჩაიშალოსო, მაგრამ არ ჩაიშლება. „ლეიბორისტული“ ფორმატიდან დასახელდება მაჟორიტარობის კანდიდატები.

ოპოზიციას კარგი მოდელი აქვს შემუშავებული და მაჟორიტარმა კანდიდატებმა შესაძლოა შეავსონ მთლიანად თბილისი ან შესაძლოა ვერა.

დასახელებულთა შორის არ იქნება პარტია „ლელო საქართველოსთვის“ წევრები.

„ლელო“ არ არის, „ლელოს“ თავის არჩევანი აქვს და კი ბატონო, მიხედოს.

მე არ ვეთანხმები მათ საარჩევნო სტრატეგიას, ცოტა ილუზიებში არიან, მაგრამ ახალგაზრდა პარტიაა, ისწავლის და გამოცდილებას მიიღებს.

როგორც მე არ მაქვს ბიზნესში გამოცდილება, ისე მათ არ აქვთ პოლიტიკაში გამოცდილება და ვფიქრობ, რომ შეცდომას უშვებენ, მაგრამ ეს მათი გადასაწყვეტია.

მე ამაში ვერ ჩავერები.

მაინც მინდა, რომ ვითანამშრომლო ყველა პროდასავლურ ოპოზიციურ ძალასთან იმისათვის, რომ ხელისუფლებას ჩამოვაშოროთ ეს უბედურება, რასაც მე ივანიშვილის ანკლავს ვეძახი, იმიტომ, რომ ხელისუფლება ხელში ჩაიგდეს… პირველი, ძალიან მნიშვნელოვანია, რომ ერთიანობა დავაფიქსიროთ; მეორე, კარი ღია დავტოვოთ საინტერესო ადამიანებისთვის და ამასაც გავაკეთებთ; მესამე – ოპოზიცია შეთანხმდა და თანხმდება ამ საკითხებზე, ამიტომ ჩვენ ამ კუთხით განცხადება ხვალ გვაქნება“

შეგახსენებთ, მთავრობასა და ოპოზიციას შორის 8 მარტს დადებული შეთანხმების საფუძველზე, 2020 წლის საპარლამენტო არჩევნებზე, თბილისში , 8 სამაჟორიტარო ოლქი იქნება, საიდანაც 2-ში, ოპოზიციის მხრიდან თავის კანდიდატს „ნაციონალური მოძრაობა“ დააყენებს დანარჩენ 6-ს კი, ოპოზიცია „გაიყოფს“.

როგორც პარტია „ლელო საქართველოსთვის“ ლიდერმა მამუკა ხაზარაძემ განაცხადა, პარტია ლელოს დადებას დამოუკიდებლად აპირებს.

აღსანიშნავია, რომ მაჟორიტარობის კანდიდატები არ ეყოლება „გირჩსა“ და „რესპუბლიკურ პარტიას”.