თბილისის ინფექციური საავადმყოფოს ბოქსირებული განყოფილების ხელმძღვანელის მარინა ენდელაძის განცხადებით, საქართველოში კორონავირუსის 1186 ახალი შემთხვევიდან ყველაზე მეტი – 469 თბილისში, 360 აჭარაში, 99 კი იმერეთში დაფიქსირდა.
დანარჩენი შემთხვევები სხვა რეგიონებზე ნაწილდება.
„თბილისში დაფიქსირდა შემთხვევების 40 პროცენტი, რაც შეესაბამება 469 პაციენტს, აჭარაში 30 პროცენტი, ანუ 360, იმერეთში შემცირდა გარკვეულწილად, დღეს არის 99 ახალი შემთხვევა, ქვემო ქართლში -78, შიდა ქართლში – 15, სამეგრელო-ზემო სვანეთში -73, კახეთში – 46, გურიაში – 25, მცხეთა-მთიანეთში -14, სამცხე ჯავახეთში – შვიდი“, – აღნიშნა მარინა ენდელაძემ.
მისივე თქმით, ქვეყნის მასშტაბით მკურნალობის ეტაპზე მყოფი 70-მდე პაციენტის მდგომარეობა კრიტიკულია.
რაც შეეხება უშუალოდ თბილისის ინფექციური საავადმყოფოს მონაცემებს, ამჟამად კლინიკაში ახალი კორონავირუსით 68 პაციენტი მკურნალობს, მათგან ექვსი ინტენსიური თერაპიისა და რეანიმაციის განყოფილებაშია მოთავსებული, მათ შორის სამი მართვით სუნთქვაზე იმყოფება. მარინა ენდელაძის განცხადებით, კლინიკაში ჰყავთ ერთი თვის ბავშვიც, რომლის მდგომარეობა სტაბილურია.
საქართველოში კორონავირუსის 1 186 ახალი შემთხვევა დაფიქსირდა, გამოჯანმრთელდა 278, გარდაიცვალა შვიდი პაციენტი.
კომენტარები