კორონავირუსის ანტისხეულების წინასწარმა კვლევამ აჩვენა, რომ ნიუ-იორკის მოსახლეობის დაახლოებით 13,9%-ს COVID-19 აქვს გადატანილი. შტატში 3000 შემთხვევითი ადამიანი გაიტესტა მაღაზიებსა და სხვადასხვა სავაჭრო ობიექტებთან იმისთვის, რომ დაედგინათ, იყო თუ არა მათში კორონავირუსის ანტისხეულები და აღმოჩნდა, რომ ნაწილს ვირუსი უკვე გადატანილი ჰქონდა. ამის შესახებ გუბერნატორი ენდრიუ კუომო საუბრობს. ინფორმაციას CNBC.
წინასწარი კვლევის მიხედვით, 19,4 მილიონი ნიუ-იორკის შტატში მცხოვრებიდან, 2,7 მილიონს COVID-19 უკვე გადატანილი აქვს. ანტისხეულები კი სხვადასხვა ადგილას მცხოვრებ ადამიანებს განსხვავებული პროპორციებით აღმოაჩნდა. მაგალითად, ქალაქ ნიუ-იორკში ყველაზე მაღალი მაჩვენებელი დაფიქსირდა (21,2 %.)
“ჩვენ აღმოვაჩინეთ, რომ შტატში 13,9%-ის პასუხი ანტისხეულების ტესტზე დადებითი იყო და მათ ის აღმოაჩნდათ, ისინი დაავადდნენ 3 კვირის წინ, 4 კვირის წინ, 5 და 6 კვირის წინ. მათ ჰქონდათ ვირუსი, ანტისხეულები გამოიმუშავეს და გამოჯანმრთელდნენ,” – ამბობს კუომო.
გუბერნატორის თქმით, ანტისხეულების ტესტებმა აჩვენა, რომ კორონავირუსით სიკვდილიანობის პროცენტი გაცილებით უფრო დაბალია, ვიდრე ის შეფარდება, რაც ოფიციალურად დადასტურებულ შემთხვევებში ფიქსირდება. ამ კვლევის მიხედვით, სიკვდილიანობის პროცენტულობა 1%-ზე დაბალია.
ჯანდაცვის მსოფლიო ორგანიზაცია კი კვლევას ეჭქვეშ აყენებს. მათი თქმით, არ არსებობს მტკიცებულება, რომ სერეოლოგიური ტესტებით შესაძლებელია დაადგინო, აქვს თუ არა ადამიანს იმუნიტეტი გამომუშავებული.
კომენტარები