“კომენდანტის” დროს, პრეზიდენტის სასახლეში საზეიმო ვახშმის გამართვის შემდეგ, მთავრობა რეგულაციების დაცვისკენ მოგვიწოდებს

მას შემდეგ, რაც გუშინ საღამოს, კომენდანტის საათის დროს, ათობით პოლიტიკოსი შეიკრიბა პრეზიდენტის სასახლეში და საზეიმო ვახშამს დაესწრო, საკოორდინაციო საბჭომ, რეგულაციების დაცვაზე და მათი აღსრულების მკაცრ კონტროლზე ისაუბრა:

„მკაცრი შეზღუდვების თავიდან აცილებისა და ეპიდემიოლოგიური მდგომარეობის კიდევ უფრო დამძიმების თავიდან აცილების მიზნით, უწყებათაშორის საკოორდინაციო საბჭოს გადაწყვეტილებით, ქვეყანაში კვლავ ნარჩუნდება შეზღუდვა 21:00-დან 05:00 საათამდე გადაადგილებასთან დაკავშირებით.

ასევე ძალაში რჩება შაბათ-კვირას კვების ობიექტებთან დაკავშირებით მოქმედი შეზღუდვა, რაც ნიშნავს, რომ ისინი მუშაობენ მხოლოდ გატანის სერვისზე. როგორც საჯარო, ასევე კერძო სექტორს კიდევ ერთხელ მოვუწოდებთ მივმართავთ რეკომენდაციით მაქსიმალურად გადავიდნენ მუშაობის დისტანციურ რეჟიმზე. ამასთან, მაქსიმალურად გამკაცრდება იზოლაციაში მყოფი პირების, მათ კონტაქტებისა და ქვეყანაში შემომსვლელების თვითიზოლაციის კონტროლი, ასევე საზღვარზე შემოსული პირების PCR-ტესტირების ჩატარების მონიტორინგი 72 საათის გასვლის შემდეგ.

საწარმოებში, სადაც გამოვლინდება შემთხვევები, მაქსიმალურად უნდა გამკაცრდეს ეპიდემიოლოგიური უსაფრთხოების ზომები და დამსაქმებელთა მაქსიმალური ჩართულობით უნდა იყოს უზრუნველყოფილი აქტიური ტესტირება. ეპიდვითარების გაუარესების გათვალისწინებით, ხანდაზმულ პირებს მოვუწოდებთ, მივმართავთ რეკომენდაციით მაქსიმალურად დარჩნენ სახლში. კიდევ უფრო მკაცრად გაკონტროლდება პირბადის სწორედ მოხმარება და დისტანციის დაცვა. ასევე, ხალხმრავალი შეკრებები, მათ შორის სოციალური ღონისძიებები, რომელთა გამართვა მთავრობის დადგენილებით აკრძალულია“, – განაცხადა გიორგი ღიბრაძემ.

საკოორდინაციო საბჭო კიდევ ერთხელ მოუწოდებს მოსახლეობას მაქსიმალურად დაიცვან რეგულაციები: გამოიყენონ პირბადე, დაიცვან სოციალური დისტანცია და უარი თქვან ხალხმრავალ შეკრებებზე.

“ალია” შეგახსენებთ, უწყებათაშორის საკოორდინაციო საბჭოს პრემიერი ხელმძღვანელობს.

გესმით, პრეზიდენტო? – თქვენ გეუბნებიან, სავარაუდოდ?!