“ფაქტ-მეტრი” – ინფორმაციას ავრცელებს კიდევ ერთი ყალბი ინფორმაციის შესახებ და წერს:
დეზინფორმაცია: ტელეკომპანია „ფორმულამ“ ლექსო ლაშქარავას ფოტოს „ფოტოშოპით“ დაზიანებები დაუმატა
ვერდიქტი: ყალბი ამბავი
21 ივლისს, სხვადასხვა Facebook-გვერდმა (ბმული 1, ბმული 2, ბმული 3, ბმული 4) გამოაქვეყნა „ტვ პირველის“ გარდაცვლილი ტელეოპერატორის, ლექსო ლაშქარავას ორი ფოტოსურათი. მათი მტკიცებით, გამოქვეყნებული ფოტოსურათებიდან ერთ-ერთი, კერძოდ კი ის, რომელზეც ლაშქარავას სახის მარჯვენა ნაწილზე სისხლის კვალი ეტყობა, ტელეკომპანია „ფორმულამ“ დაამონტაჟა და ძალადობრივი ჯგუფების მიერ ნაცემ ლაშქარავას „დაზიანებები დაუმატა“. Facebook-გვერდებს არგუმენტად სხვა ფოტოსურათი მოჰყავს, რომელზეც ლაშქარავას სახის მარჯვენა ნაწილზე სისხლის კვალი არ აღენიშნება. აღსანიშნავია, რომ აღნიშნული დეზინფორმაცია იმ Facebook-გვერდებმა კოორდინირებულად გამოაქვეყნეს, რომლებიც ხელისუფლების მხარდამჭერ და ოპოზიციის მადისკრედიტირებელ მასალებს კამპანიურად ავრცელებენ.
5 ივლისს, „თბილისი პრაიდის” წინააღმდეგ გამართული აქციის გაშუქების დროს, ორგანიზაცია „სირცხვილიას“ ოფისში, ტელეკომპანია „ტვ პირველის“ ჟურნალისტსა და ოპერატორს, ალექსანდრე ლაშქარავას სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენეს. ლაშქარავა 11 ივლისს გარდაიცვალა, ხოლო შინაგან საქმეთა სამინისტრომ საქმეზე გამოძიება დაიწყო. 5 ივლისის მოვლენები და ლაშქარავას გარდაცვალება ქვეყანაში კიდევ ერთი პოლიტიკური კრიზისის საფუძველი გახდა.
მოცემული ფოტოსურათები ლაშქარავაზე ფიზიკური ძალადობიდან მცირე დროის შემდეგაა გადაღებული, რისი თქმის საშუალებასაც შესაბამისი ვიდეომასალის არსებობა იძლევა. სხვადასხვა ვიდეომასალაში ჩანს, რომ ლაშქარავა ფიზიკური დაზიანებების მიღების შემდეგ იატაკზე ზის და დახმარების აღმოჩენას ელოდება, ხოლო მას თან წყლის ბოთლი და ნაჭერიც აქვს.
აღსანიშნავია, რომ ფოტოსურათი, რომელიც, Facebook-გვერდების მტკიცებით, ტელეკომპანია „ფორმულამ“ „ფოტოშოპით დაამონტაჟა“ სხვადასხვა მედიამ, მათ შორის, უცხოურმა საშუალებებმაც გამოიყენეს.
„ფაქტ-მეტრმა“ მოიძია ვიდეომასალა, რომელშიც ცხადად ჩანს, რომ სასწრაფო დახმარების მანქანაში მყოფ ლექსო ლაშქარავას სახის მარჯვენა ნაწილში სისხლის კვალი ნამდვილად ჰქონდა.
ამასთან, არსებობს თავდასხმის შემდეგ ლაშქარავასთვის სხვადასხვა კუთხიდან გადაღებული ფოტოსურათები, რომლებიც „ტვ პირველის“ ოპერატორის სახის მარჯვენა ნაწილზე სისხლის კვალს ნათლად ასახავს (ბმული 1, ბმული 2).
აღნიშნული სურათები, რომელიც ტელეკომპანია „კავკასიას“ Facebook-გვერდზეა განთავსებული, 5 ივლისის 13:15 წუთით თარიღდება.
საყურადღებოა, რომ ტელეკომპანია „ფორმულას“ მიერ Facebook-გვერდზე გამოქვეყნებულია როგორც ლაშქარავას ფოტოსურათი, რომელზეც მას სახის მარჯვენა ნაწილზე სისხლის კვალი აღენიშნება, ასევე ის ფოტოსურათიც, სადაც სისხლი არ ჩანს, რაც კიდევ ერთი არგუმენტია, რომ ტელეკომპანია „ფორმულას“ ფოტოსურათი არ დაუმუშავებია. მანიპულაციის სურვილის შემთხვევაში, ალოგიკურია, რომ ტელეკომპანიას აღნიშნული ფოტოსურათები დროის მოკლე მონაკვეთში გამოექვეყნებინა.
აღსანიშნავია, რომ ლაშქარავას ცემის შემდეგ გადაღებულ ფოტო და ვიდეო მასალებში ორივე შემთხვევა ჩანს: სახის მარჯვენა ნაწილში როგორც სისხლის კვალის არსებობა, ასევე არარსებობა. ფიზიკური ძალადობის ფაქტიდან რამდენიმე დღის შემდეგ ჩაწერილ ინტერვიუზე დაყრდნობით, შეიძლება ითქვას, რომ ლაშქარავას სახის მარჯვენა ნაწილში ვიზუალური დაზიანება არ აღენიშნება. ამდენად, აღნიშნული შესაძლოა, მიუთითებდეს იმაზე, რომ ლაშქარავას სახის მარჯვენა ნაწილზე სისხლი დასვრილი ნაჭრიდან ან ხელიდან გადავიდა. თუმცა, მტკიცება, რომ ტელეკომპანია „ფორმულამ“ ლექსო ლაშქარავას ფოტოსურათი „დაამონტაჟა“ და ოპერატორს დაზიანებები ფოტოშოპით დაუმატა, ტყუილია, რაზეც არსებული ფოტო და ვიდეო მტკიცებულებები მეტყველებს.
კომენტარები