ხმაური საკონსტიტუციო სასამართლოსთან – თენგიზ შარმანაშვილმა ლევან ცუცქირიძეს “ქაჯი” უწოდა

ხმაური და სიტყვიერი დაპირისპირება იყო რამდენიმე წუთის წინ ბათუმში, საკონსტიტუციო სასამართლოსთან, სადაც ოპოიზიციური პარტიებსი აკრძალვის შესახებ სარჩელის განხილვა იწყება

სასამართლოს შენობაში შესვლისას, “ოცნების” დეპუტატმა, თენგიზ შარმანაშვილმა “თავისუფლების მოედნის” დამფუძნებელს, ლევან ცუცქირიძეს “ქაჯი” უწოდა.

“ქაჯობა ის არის, რასაც აკეთებთ და გრცხვენოდეთ ყველას, არ დაავიწყდა ეს არავის”, – უპასუხა ცუცქირიძემ შარმაშაშვილს.

დღეს, 21 ოქტომბერს, საქართველოს საკონსტიტუციო სასამართლო ხუთი ოპოზიციური პარტიის აკრძალვის შესახებ სარჩელის განხილვას იწყებს.

არსებითი განხილვა 21, 22 და 23 ოქტომბერს არის დაგეგმილი.

საკონსტიტუციო სასამართლოში წარდგენილ სარჩელს პარლამენტის 88 წევრი აწერს ხელს. მათი სარჩელის საფუძველზე სასამართლოს დღის წესრიგში შემდეგი პოლიტიკური გაერთიანებების არაკონსტიტუციურად ცნობის საკითხი დგას: – “ერთიანობა − ნაციონალური მოძრაობა“; “კოალიცია ცვლილებისთვის – გვარამია მელია გირჩი დროა“; “ძლიერი საქართველო − ლელო, ხალხისთვის, თავისუფლებისთვის!“, “ფედერალისტური პარტია“ და პარტია “გახარია საქართველოსთვის“.

სარჩელის განხილვა საზოგადოებრივი მაუწყებლის პირდაპირ ეთერში გადაიცემა.  სხდომების პირდაპირი ტრანსლაცია პარალელურ რეჟიმში სასამართლოს ოფიციალურ „იუთუბ“ არხზეც განხორციელდება.

საკონსტიტუციო სასამართლოს მოსამართლეებს სარჩელის განხილვა აქციის ფონზე მოუწევთ – სასამართლოს შენობასთან დღეს საპროტესტო აქცია გაიმართება. სწორედ ამიტომ ადგილზე დილიდან უამრავი სამართალდამცველია მობილიზებული.

ასევე შეზღუდვები დაწესდა ჟურნალისტებისთვის – მედიას დღეს სხდომათა დარბაზში არ შეუშვებენ.