“ხმას მივცემ ნიკა მელიას, რომ ეს კრაზანების ბუდე ამოიძირკვოს, მეუღლესთანაც მქონდა დისკუსია, უჭირს ხუთიანის შემოხაზვა” – ხუხაშვილი

პოლიტოლოგი, გია ხუხაშვილი, “ტვ პირველთან” ამბობს:

“სახელმწიფო ინტერესებშია, თბილისმა დააბალანსოს ივანიშვილის მიერ უზურპირებული ძალაუფლება. მელიას შეუძლია იმ ტიპის კამპანიის წარმოება, რომლის შედეგადაც, ქვეყანა მიიღებს სასურველ შედეგს, თუ თბილისი გამოსტაცა უზურპატორებს ქართველმა ხალხმა, რომ შემდეგი არჩევნების შედეგად მივიღოთ ნორმალური ხელისუფლება.

რთული ამოცანაა, ჩემ მეუღლესთანაც მქონდა დისკუსია, მას უჭირს ხუთიანის შემოხაზვა, წმინდა ემოციურია, ჩვენი ოჯახი ტრამვირებული იყო იმ ხელისუფლების პერიოდში, კობახიძისგან და ღარიბაშვილისგან განსხვავდებით. ამნეზია კი არ გვჭირს – ყველაფერი კარგად გვახსოვს, ახლა რომ ლაპარაკობენ სისხლიან 9 წელზე, ესენი კი არ იყვნენ რეპრესირებულნი, ჩვენ ვიყავით, ჩვენ ზურგზე გადაიარა. მე ჩემ მეუღლეს ვუხსნი, რომ ერთია ჩვენი ემოცია და მეორე – სახელმწიფო ინტერესები. ნიკა მელია, არც არის კლასიკური ნაციონალური მოძრაობის სიმბოლო, პიროვნებაა, თავისი მინუსებით და პლიუსებით, სახელმწიფო ინტერესებიდან გამომდინარე, მე წავალ და მივცემ ხმას ნიკა მელიას. მიუხედავად იმისა, რომ ნაციონალური მოძრაობა არის ჩემთვის მიუღებელი, ახლა მიმაჩნია, რომ ასეა სწორი, რომ ეს კრაზანების, კორუფციული ბუდე ამოიძირკვოს.”