„ზიანის ანაზღაურების საჭიროება თუ იქნება, აანაზღაურებს. დეტალებზე არ მინდა ვისაუბრო… [ბრალის აღიარებას] ვერც დაგიდასტურებთ და ვერც უარვყოფ… პირობითით ითხოვს გათავისუფლებას…“ – თქვა თავდაცვის ყოფილი მინისტრის ადვოკატმა, ხათუნა ხურცილავამ.
პროკურორი ანი ლეკიაშვილი ამბობს, რომ საპროცესო შეთანხმების გაფორმების სურვილს დიდი ხანია გამოთქვამენ, თუმცა, ასევე ამბობს იმასაც, რომ იმ შემთხვევაშიც კი, ბრალი რომც აღიაროს და გადაიხადოს 7 მილიონიც, რასაც ედავებიან, შეიძლება საპროცესო შეთანხმება მაინც არ გააფორმონ.
„რა თქმა უნდა, ზიანი უნდა იყოს სრულად ანაზღაურებული და დაზარალებულს არ უნდა ჰქონდეს პრეტენზია… შესაძლებელია ზიანიც ანაზღაურებული იყოს, ბრალდებულიც აღიარებდეს, თუმცა მხარეები ვერ შეთანხმდნენ და არ გაფორმდეს საპროცესო შეთანხმება“, – თქვა პროკურორმა და აღნიშნა, რომ თავდაცვის სამინისტროსთვის მიყენებული ზიანის მოცულობა 7 მილიონ ლარამდეა.
შესაძლოა, თუ არა, რომ პროკურატურამ, რომელიც ბოლო თვეების მანძილზე, არაერთხელ და თავად ისაუბრა საპროცესო შეთანხმებაზე, ახლა, როცა ჯუანშერ ბურჭულაძემ გადაწყვიტა და მიმართა, უარი უთხრას და ისე, რომ სასჯელი არც კი შეუმციროს, ქართულ ოცნებას, მისივე ყოფილი თანაგუნდელის მიმართ დაუტოვოს პოლიტიკურ იარაღად მისი აღიარება, ან მისი მიმართვა საპროცესო შეთანხმებისათვის? – ვნახოთ.
ცნობისთვის, პროკურორი, ცოტა ხნის წინ ამბობდა:
“საპროცესო შეთანხმებას აქვს თავისი კონკრეტული დანაწესები – პირველი ეს არის ბრალის აღიარება და მეორე – სასჯელზე შეთანხმება ბრალდების და დაცვის მხარეს შორის. დღეის მდგომარეობით, ბრალის აღიარება არ მომხდარა… ეს ყველაფერი უნდა განხორციელდეს სასამართლო სხდომაზე, მსგავსი რამ, ჯერჯერობით, არ მოგვისმენია. გარკვეული წინაპირობები, რომლებიც არსებობს, მათ შორის ზიანის ანაზღაურება, სასჯელზე შეთანხმება, ჯერჯერობით, არ არის მიღწეული”
კომენტარები