ბექა ჯაიანის საქმის პროკურორმა გრიგოლ ნიშნიანიძემ სასამართლო დარბაზში მოწმეთა ჩვენებები წაიკითხა. მათი უმეტესობა ჯაიანის მხრიდან აბრამიძის მიმართ ფიზიკურ და ფსიქოლოგიურ ძალადობაზე საუბრობს.
კესარიას უწოდებდა ბუნების შეცდომას, უმოწმებდა ტელეფონს, უკონტროლებდა ჩაცმის სტილს და თუ რამე არ მოეწონებოდა, სცემდა, ყელში ახრჩობდა, თმითაც უთრევია”- ამბობს, პროკურორის მტკიცებით, ერთ-ერთი მოწმე ჩვენებაში.
“იშვიათად გამოდიოდა სახლიდან, რისი მიზეზიც ბექა ჯაიანი იყო. ბექა მას ამცირებდა, ეუბნებოდა რომ მამაკაცი იყო და ამის გამო სცემდა, თითქმის ყოველდღიურად სცემდა, დალურჯებული სხეული მაჩვენა, რისი მიზეზიც ტელეფონზე შესული შეტყობინება იყო, რისი ჩვენებაც ჯაიანმა თხოვა, უარის შემდეგ კი ის სცემა”,- აცხადებს მოწმე.
კიდევ ერთი მოწმის ჩვენების მიხედვით, მან მკვლელობის დროს კესარია აბრამიძის ყვირილი გაიგო – “ნუ მირტყამ, არ დამარტყაო – შემდეგ კი, დაინახა როგორ ჩარბოდა კიბეებზე ბექა ჯაიანი”.
გრიგოლ ნიშნიანიძემ სასამართლოს სხდომათა დარბაზში დიდ მონიტორზე მოახდინა მტკიცებულებათა ნაწილის დემონსტრირებს, მათ შორის, აჩვენა მკვლელობის იარაღი – დანა და შემთხვევის ადგილი.
პროკურორის თქმით, კესარია აბრამიძე განსაკუთრებული სისასტიკით არის მოკლული, ამას სხვა მტკიცებულებებთან ერთად ჭრილობების რაოდენობაც მოწმობს – 28 დაზიანება, რომელიც მას სხეულის თითქმის ყველა ნაწილზე ჰქონდა.
ცნობისთვის, 37 წლის ტრანსგენდერი ქალის, კესარია აბრამიძის განსაკუთრებული სისასტიკით, გენდერის ნიშნით განზრახ მკვლელობაში ბრალდებული 26 წლის ბექა ჯაიანი ქუთაისის აეროპორტის მიმდებარე ტერიტორიაზე 2004 წლის 19 სექტემბერს დააკავეს.
გამოძიება სისხლის სამართლის კოდექსის 109-ე მუხლის „თ“ და „მ“ პუნქტებით მიმდინარეობს, რაც გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობას გულისხმობს.
აღნიშნული დანაშაული 16-დან 20-წლამდე ან უვადო თავისუფლების აღკვეთას ითვალისწინებს.
კომენტარები