2020 წლის საპარლამენტო არჩევნებში რუსთავის მაჟორიტარობისთვის სავარაუდოდ, სახელმწიფო უსაფრთხოების სამსახურის უფროსის ყოფილი მოადგილე იოსებ გოგაშვილი იბრძოლებს.
როგორც “2020NEWS”-თვის ექსკლუზიურად გახდა ცნობილი, იოსებ გოგაშვილს კონსულტაციები აქვს “ქართულ ოცნებასთან” რუსთავის მაჟორიტარულ ოლქში კენჭისყრასთან დაკავშირებით. გოგაშვილის სავარაუდო კონკურენტი, რომელთანაც ხელჩართული ბრძოლა ელოდება “ნაციონალური მოძრაობის” ერთ-ერთი ლიდერი დავით კირკიტაძე იქნება, რომელიც მიხეილ სააკაშვილის ხელისუფლების გუბერნატორი იყო ქვემო ქართლში.
სოსო გოგაშვილი აღნიშნულ ინფორმაციას სააგენტოსთან საუბარში არ ადასტურებს, თუმცა არც კატეგორიულად უარყოფს.
“არაა ეგ ინფორმაცია სწორი. მე კენჭს ვიყრი რესპუბლიკური პარტიიდან ვირჯინიის შტატში სენატში ვაკანტურ ადგილას. ეს უფრო სიმართლესთან ახლოსაა”, – უპასუხა გოგაშვილმა სააგენტოს მიერ დასმულ კითხვას შეესაბამება თუ არა სიმართლეს ინფორმაცია მისი სავარაუდო კანდიდატობის შესახებ.
“2020NEWS” ცოტა ხნის წინ წერდა, რომ გოგაშვილი მაჟორიტარობისთვის კახეთში იბრძოლებდა თუმცა, „ქართულ ოცნებაში“ პოლიტიკური კონფიგურაცია ისე შეიცვალა, რომ კახეთის სამაჟორიტარო ოლქი უკვე შეივსო და იქ მოქმედი გუბერნატორი ირაკლი ქადაგიშვილი და სავარაუდოდ, პარლამენტის მოქმედი დეპუტატი დავით სონღულაშვილი შეეცდებიან გამარჯვების მოპოვებას.
აღსანიშნავია, რომ ამ უკანასკნელის, დავით სონღულაშვილის შემთხვევაში მდგომარეობა შესაძლოა, კვლავ შეიცვალოს და კახეთში მეორე მაჟორიტარობისთვის თავდაცვის მოქმედმა მინისტრმა, ირაკლი ღარიბაშვილმა ან მისი გარემოცვის წევრმა, ე.წ. “კახური კლანისთვის” მისაღებმა კანდიდატმა იბრძოლოს.
2020ნიუსი
კომენტარები