კენიამ ივანიშვილს ბაობაბების ტრანსპორტირება აუკრძალა – “დაიწყო გამოძიება ლიცენზიებზე”

კენიურმა სასამართლომ ხეების იმპორტი საქართველოში სანებართვო ლიცენზიების არარსებობის მიზეზით აკრძალა.

შეჩერებულია ყველა ამოთხრილი ასწლოვანი ბაობაბის ტრანსპორტირება ივანიშვილისთვის, კომპანიას კი, რომელსაც ხეები უნდა ჩამოეტანა, ლიცენზიაც ჩამოართვეს.

აფრიკის ბაობაბების ასოციაციის თავმჯდომარე ჯუს ლე ბრეტონი:

“ჩვენი მიზანია, სარგებელი მოვუტანოთ აფრიკაში სოფლად მცხოვრებ ადამიანებს, რადგან ბაობაბის ნაყოფი საკვებში გამოიყენება, თესლი კი ზეთის წარმოებისთვის. ამიტომ, მე ვთვლი, რომ კენიის მთავრობის გადაწყვეტილება ბაობაბის საქართველოში ექსპორტის აკრძალვის თაობაზე, სწორია. გარდა ამისა, მე არ მჯერა, რომ მთლიანი ბაობაბი შეიძლება ამოძირკვო და გადაიტანო კენიიდან საქართველოში ისე, რომ ხე არ გახმეს და გადარჩეს.

მე ვთვლი, რომ კენიის მთავრობის გადაწყვეტილება არის დიდი გამარჯვება კენიელი ხალხისთვის და ასევე კენიის ბიომრავალფეროვნებისთვის. ვფიქრობ, ეს აგზავნის ძალიან ძლიერ სიგნალს, რომ კენიის ბიომრავალფეროვნება არ შეიძლება უბრალოდ აიღო და გაყიდო ისე, რომ კენიელმა ხალხმა სარგებელი ვერ ნახოს. არ შეიძლება, რომელიმე უცხოელი ჩამოვიდეს, ფული გადაუხადოს რომელიმე ოფიციალურ პირს და როგორც სურს, ისე გამოიყენოს კენიის მემკვიდრეობა.

ეს ძლიერი სიგნალია, საერთაშორისო წესების შესახებ, რომლებიც კრძალავს ერთი ქვეყნის მიერ მეორე ქვეყნის ბიომრავალფეროვნების მოპარვას.

“გარდიანის” ჟურნალისტი ქეროლაინ ემ კიმეუ:

“მთავრობა ახლა აქტიურად აწარმოებს გამოძიებას, ვვარაუდობ, რომ იქნება კიდევ ბევრი შეკითხვა, თუ როგორ იქნა გაცემული ეს ლიცენზიები და გარდა ამისა, ერთ-ერთი მთავარი პრობლემა ის არის, რომ ადგილობრივი მოსახლეობა არ იყო ჩართული ამ პროცესში სათანადოდ და ვერ მიიღო შესაბამისი სარგებელი ამ გარიგებიდან.

მე ვიცი, რომ დენის გათიშვებიც მოხდა იმის გამო, რომ ტოტებმა ელექტროგადამცემი ხაზები დააზიანა. ასე რომ, ეს ხეები უკვე გზაში იყო, ახლა კი მთავრობამ ეს შეაჩერა და სანამ გამოძიება არ დასრულდება, ტრანსპორტირება არ განახლდება.”