გუშინ გავავრცელეთ მიხეილ კალანდიას ადვოკატთან – ზურაბ თოდუასთან ინტერვიუს ნაწილი, ახლა გთავაზობთ ამ ინტერვიუს მეორე და ბოლო ნაწილს, სადაც სხვასთან ერთად საუბარია ფრაზაზე – “საჩეხაოდ წავიდეთ”
–კარგი, გადავიდეთ ფრაზაზე, მივდივართ საჩეხაოდ.
-ეგ ფრაზა მოიგონა სერგი კაპანაძემ, საპარლამენტო კომისიის მუშაობის პერიოდში, ის ბავშვებს კარნახობდა, მინიშნებულად რაღაცა ეთქვათ ბავშვებს, საჩეხაოდ, საშტირაოდ, ვიჩეხაოთ, ეს არის მისი მოგონილი. ამის შემდეგ დაიწყეს ამ ბავშვებმა ჩვენებების მიცემა. მე მაქვს უნიკალური ვიდეო მასალა, თუ მე არ მომეცემა შესაძლებლობა სასამართლოზე გამოვაქვეყნო, პროკურორი კი დამემუქრა, პასუხისგება დადგება თქვენიო, მაგრამ ჩემი კლიენტის დასაცავად ყველაფერს გავაკეთებ. ორი ვიდეო მაქვს, სადაც ერთ-ერთ მოწმეს, პარლამენტის დროებითი საგამოძიებო კომისიის წევრები ეუბნებიან, რომ თქვას, ჯანაშიამ როგორ მოუწოდა საჩეხაოდ წასასვლელად, ან სახანჯლაოდ წასასვლელად, ბავშვმა არ თქვა, მშობელმა უკარნახა სიტყვა კასტეტი და კაპანაძემ უთხრა, კასტეტი ახლა ნამეტანიაო, ბოლოს უკვე ბავშვმაც თქვა, ხო საჩეხაოდ მომწერაო.
-თუმცა საპარლამენტო კომისიის დასკვნაში ეს წინადადება არ წერია.
-არ წერია, ვიდეო ჩანაწერებშია. მერე ბავშვები აჭრილები არიან და ჩვენების მიცემა დაიწყეს. მეორე ბავშვია, დედა-შვილი დატოვეს მარტო, კამერა ჩართული, დედა ეუბნება, ხომ არ დაგავიწყდა რა უნდა თქვა, ხომ უნდა თქვა, ხომ უნდა თქვა – ექაქანება ბავშვს და მერე ის ბავშვი ისეთ ზღაპარს ჰყვება.
–ეს ჩანაწერები თქვენ საიდან?
-ეს საქმის მასალებში მტკიცებულებად იყო, დაშვებულია და დავიწყებ გამოქვეყნებას, მართალია პროკურორი დამემუქრა, თუ გამოაქვეყნებ პასუხისგება დაგეკისრებაო, მაგრამ მე ჩემი კლიენტის დასაცავად ყველაფრისთვის მზად ვარ.
–რამდენმა ბავშვმა დაადასტურა მესიჯის მიღება – წავიდეთ საჩეხაოდ?
-კალანდიამ თითქოს მიწერა ჯანაშიას, წამო საჩეხაოდ წავიდეთ, ჯანაშიამ დაურეკა მენაბდეს, მენაბდემ დაურეკა ბარბაქაძეს, საჩეხაოდ მივდივართ – ეს მტკიცებულებით არ დასტურდება.
-თქვენ წეღან თქვით, რომ ის ფაქტი რომ ჯანაშიას ახრჩობდა სარალიძე და ჯანაშია ფართხალებდა – არ დასტურდება მტკიცებულებით, მაგრამ დასტურდება მოწმეთა ჩვენებით – იქ მოწმეთა ჩვენება არ არის სადაო და აქ სადაოა? იგივე არ არის ეს მოწმეები?
–ტვინგადაბრუნებული, არასწორად ინფორმირებული ადამიანების გასაგონად, ცუკერბერგმა მოგვცა დაშვება ოთხი აბონენტის მიმართ, 1-3 დეკემბრის ჩანაწერებში, ერთი ფრაზაც არ არის არსად.
-მაგრამ, იქ არ არის წინა საღამოს ჩანაწერი.
-მკვლელობის შემდეგი ჩანაწერებია.
–მკვლელობამდე ჩანაწერები? ამ ფრაზას მანამდე ხომ ვერ მისწერდნენ?
-რაღაცა რომ ყოფილიყო, ამ 33 ბავშვში (ჯგუფი ჰქონდათ შექმნილი), ვინმეს რამე არ უნდა წამოსცდენოდა?
-მენაბდეს ჩანაწერი ამოღებულია?
-კი.
–მერე იმას ჰყვება შარვალი გავრეცხეო?
-არა, მაგას არ ჰყვება…
–ხოდა, აბა, სხვები რატომ მოჰყვებიან, წავიდნენ დანებით, ყოველდღე დადიოდნენ დანებით, ხო?
-კალანდიამ დაუძახა დანა წამოიღეო? ბარბაქაძე სკოლიდან მოდის და ანუ, მას დანა აქვს სკოლაში, ჯანაშია სკოლაში საერთოდ არ იყო, საბლატაოდ იყო იმ დღეს ქუჩაში, ჯანაშია არის დანებს კოლექციონერი, 200-მდე დანა აქვს კოლექციაში, მიდრეკილია ამით და დიდებული, არ არის ამაში ცუდი არაფერი, ამ საქმეში პროფესიონალია, დანებში კარგად ერკვევა. საჩეხაოდ წასული ადამიანები, ფარდულთან დადგებოდნენ და არა მოშორებით.
–ამას ამტკიცებთ მოწმეთა ჩვენებით?
-რა მოწმეთა ჩვენებით, დადასტურებულია, ბრალდების მოწმეები, სარალიძის მეგობრები არიან.
–კალანდიას მეგობრები ამბობენ, მესიჯი მივიღეთ, რომ საჩეხაოდ წავიდეთო და იმათი არ გჯერათ და სარალიძის მეგობრების გჯერათ?
-რომელი მეგობრები ამბობენ? კალანდიას არც ერთი მეგობარი არ ამბობს, ეს არის საპარლამენტო კომისიაზე გაჟღერებული ფრაზა და ბავშვებმა გაიმეორეს.
–რამდენმა ბავშვმა თქვა, რომ მიიღეს მესიჯი?
-ორმა. აქედან ერთი წყაროს ვერ ასახელებს, მიწერეს, დაურეკეს – არ მახსოვსო ამბობს. ეს არის სერგი კაპანაძის იდეა
–კალანდია ურტყამს ხელს?
-კალანდია ექაჩება სარალიძეს და ურტყამს…
–ექაჩება, თუ ურტყამს?
-შეიძლება ჩარტყმულიც ჰქონდეს თავის არეში მუშტი, არ გამოვრიცხავ
-დანა?
-დანა არ ჰქონია.
-სადაც კალანდია იდგა, იმ მხრიდან რამდენი ჭრილობა აქვს სარალიძეს?
-პირველი ჭრილობა აქვს მიყენებული ზურგის არეში სარალიძეს, მე-11 ჭრილობა, რომელმაც გამოიწვია ფატალური შედეგი, შეიძლება იყოს იგივე დანით მიყენებული, რომელიც ზურგში ჩაარტყეს. ყოჩაღ, კარგი კითხვაა. შესაძლოა სწორედ ეს დარტყმა დაინახა იმ მოზარდმა, რომელმაც დაინახა რომ სარალიძეს ზურგში ჩაარტყეს და და დაარტყა მენაბდეს.
-დანარჩენი ჭრილობები?
-დანარჩენი 5 ჭრილობამდე მიყენებულია ჯანაშიას დანით და დანარჩენი შესაძლებელია იყოს რამდენიმე დანა და ერთი და იგივე სერიული წარმოების და ვერ ვასხვავებთ, ერთნაირი პარამეტრებისააო.
-იმ მხარეს, სადაც კალანდია დგას.
-კალანდიას მხარეს არის სწორედ ნაკლები ჭრილობა. ექსპერტს ვეკითხები, შესაძლებელია თუ არა ეს ჭრილობა, აი, მე-11, მარჯვენა ბარძაყზე სადაც არის მოხვედრილი, სარალიძისგან მარჯვნივ მდგომი წარმოიდგინეთ და შეიძლებოდა თუ არა დანა ჭეროდა ზემოდან ქვემოთ მიმართულებით? თუ ქვემოდან ზემო მიმართულებით? ვერ გეტყვით პასუხსო.
–თუ დაბალი იყო, სარალიძეზე, რა თქმა უნდა ქვემოდან ზემოთ დაარტყამდა დანას, რად უნდა კითხვა?კალანდია რომ იდგა იმ მხარეს რამდენი ჭრილობა აქვს?
-მარჯვენა მხარეს აქვს ყველაზე ბევრი ჭრილობები.
-მარცხენა მხარეს არა აქვს ჭრილობები?
-კი აქვს, მაგრამ ისეთი არა. იმ ადამიანმა, სწორედ ის ჭრილობები დაინახა ზურგში მიყენებული, ამიტომ წამოვიდა და დაარტყა მენაბდეს დანა. ამ ჭრილობას ვერ მიაყენებდა ჯანაშია, ეს მიაყენა მისგან ზურგით მდგომმა ადამიანმა.
-თქვენ მთხოვეთ, ჯანაშიას მდგომარება დამეწერა ამ სიტყვი – ფართხალებს – ფართხალებს რას ნიშნავს?
-აწევს, დაწევს, როგორც ყვებიან, კი, იგუდებოდა, საწყალი.
–ეს ხდება 15 წამში?
-კი…
–ფართხალებს, ხან მიწაზე დააგდებს, ხან აწევს, იგუდება, მაგრამ დანას იღებს ჯიბიდან, ხსნის და 5 ჯერ არტყამს…
-ეს მოქმედებაა ნამდვილად, ჩემი, გონიერი ადამიანის შეფასებით.
–ექსპერტიზის პასუხის მიხედვით, შეიძლებოდა 5 და მეტი დანა ყოფილიყო, როგორც მიყვებით.
-არ არის გამორიცხული.
–თქვენ ცოტა ხნის წინ ამბობდით, რომ გჯერათ, კალანდიას არ ახსოვს რა ედო ჯიბეში, რა აჩვენა 5 ბავშვს.
-კევი გაქვთ ჯიბეში გახსენდებათ?
-და ეს კევი რომ ხუთ კაცს ვაჩვენო? – კი. კევია ბასრი საგანი?
-ეს არის ბასრი საგანი?
–თქვენ წეღან არ დამიდასტურეთ?
-როდის დაგიდასტურეთ?
–ხომ გკითხეთ, შეიძლებოდა თუ არა ამით დაეჭრა თქო – კიო, შესაძლებელიაო, მითხარით. გარეცხა ეს საგანი?
-რა იყოს გასარეცხი, ვინც გარეცხა დანა მას კითხეთ, კალანდიას რეცხვა არავის მოსაზრებია, თქვენ ხართ ტენდეციური.
„ალია“ დაუკავშირდა სერგი კაპანაძესაც, რომელმაც აბსურდული უწოდა ზურაბ თოდუას ბრალდებას და თქვა, რომ ყველა აუდიო ჩანაწერი, ინახება პარლამენტში და ნებისმიერ დროს შეუძლიათ გამოთხოვა და გამოყენება. ჩვენ ადვოკატის ვრცელი ინტერვიუს გამო, ბატონ სერგისთან ძალიან მოკლე კომენტარი ჩავწერეთ:
სერგი კაპანაძე:
-ჩვენს გარდა კომისიის წევრები იყვნენ „ქართული ოცნებიდანაც“, მსგავსს ფაქტს რომ ჰქონოდა ადგილი, აუცილებლად გააპროტესტებდნენ, ან მერე იტყოდნენ.
-გახსოვთ მსგავსი ფრაზა – საჩეხაოდ წავიდეთ?
-არა, არ მახსოვს.
-შთაბეჭდილება? რა შთაბეჭდილება დაგრჩათ, მომზადებულნი წავიდნენ დანის გამოსაყენებლად, თუ არა?
-ფაქტია, რომ დანებით წავიდნენ.
–გახსოვთ ფოტო, სადაც კალანდია რაღაც ნივთს აჩვენებს მოზარდებს?
-კი
–კომისიის რომელიმე წევრს დარჩა შთაბეჭდილება, რომ ეს შეიძლებოდა ყოფილიყო კევი ან სანთებელა?
-არა
პ.ს. რაკი ზურაბ თოდუამ ღიად დაადო ხელი მენაბდეს სარალიძის მკვლელობაში მონაწილეობის მიღებაში, ასევე მენაბდის მამას, რომელიც სასულიერო პირია, დანაშაულის დაფარვაში – ჩვენ ღიად ვაცხადებთ სურვილს, ჩავწეროთ მენაბდის ვერსიაც მომხდარის თაობაზე.
თამო კეშელავა (555 46 08 04)
ალია №2
კომენტარები