“ჯოჯოხეთში განსაკუთრებული ქვაბი ელით იმათ, ვინც არგუმენტის გარეშე, წარმატების ილუზია შეუქმნეს გულუბრყვილო ადამიანებს” – ზურაბ გურული

აშშ-ს მასაჩუსეტის უნივერსიტეტის პროფესორი, ზურაბ გურული:

“გამარჯვებული მეომრები ჯერ იგებენ ომს და მერე შედიან ბრძოლაში; დამარცხებულები კი ჯერ ბრძოლაში შედიან და მერე ეძებენ გამარჯვებას”
( სუნ ცზი, “ომის ხელოვნება”)
———-

ჯოჯოხეთში განსაკუთრებული ქვაბი ელით იმათ, ვინც ყოველგვარი საფუძვლიანი არგუმენტის გარეშე, წარმატების ილუზია შეუქმნეს გულუბრყვილო ადამიანებს და უზარმაზარ ფსიქოლოგიურ შოკში გაატარეს უკვე მერამდენედ.
იმათ, ვინც ჰიპოთეტურადაც კი დაუშვა, რომ მსოფლიო მასშტაბის უმდიდრესი კომბინატორი, რომელიც მთელ ქვეყანას პირად საკუთრებაში ფლობს, სერიოზული დაზღვევის გარეშე გავიდოდა საასპარეზოდ ისეთ შეჯიბრში, რომელში დამარცხებაც მისი ფიზიკური განადგურების ტოლფასია.
იმათ, ვინც ჰიპოთეტურადაც კი დაუშვა, რომ შესაძლებელია კაზინოში შეხვიდე, მის მფლობელს ეთამაშო მის მიერვე შექმნილი წესებით და იქედან მოგებული გამოხვიდე.
იმათ, ვინც საეთერო სივრცე დაუთმო პოლიტიკურ მეძავებსა და შულერებს, რომლებმაც თავიანთი ფსევდო-ანალიზებით ყალბი იმედები შეუქმნეს მიამიტ ადამიანებს.
რაც შეეხება თავად გულუბრყვილოებს, ისინი ისედაც ჯოჯოხეთში არიან და მანამ იქნებიან, სანამ არ გაიზრდებიან და ინფანტილიზმს არ დათმობენ.
გვახსოვდეს, ჯოჯოხეთის კარი შიგნიდან არის ჩაკეტილი და არა გარედან.