8 აპრილს, აშშ-ის პრეზიდენტმა, ჯო ბაიდენმა ორ კანონპროექტს ხელი მოაწერა, რომლებიც რუსეთისა და ბელორუსის წინააღმდეგ დამატებით სანქციებს აწესებს. ამის შესახებ ინფორმაცია თეთრმა სახლმა გაავრცელა.
პირველი კანონპროექტი რუსეთთან და ბელორუსთან „ნორმალურ სავაჭრო ურთიერთობებს“ აჩერებს, რომლის საშუალებითაც აღნიშნული ქვეყნებიდან იმპორტზე უფრო მაღალი გადასახადები წესდება. მეორე კი, რუსეთიდან ენერგეტიკული პროდუქტების, მათ შორის ნავთობის, ქვანახშირისა და ბუნებრივი აირის იმპორტს კრძალავს.
კვირის დასაწყისში ბაიდენის ადმინისტრაციამ რუსეთის ძირითადი ფინანსური ინსტიტუტებისა და კრემლთან დაკავშირებული რიგი ფიზიკური პირების მიმართ დამატებითი სანქციები გამოაცხადა, რომელთა შორისაც რუსეთის პრეზიდენტის, ვლადიმერ პუტინის ორი ქალიშვილიც მოხვდა.
აშშ-მა ასევე გამოაცხადა სანქციები პუტინის საგარეო საქმეთა მინისტრის, სერგეი ლავროვის მეუღლისა და ქალიშვილის წინააღმდეგ.
ამასთან ერთად, სენატმა ასევე ერთხმად მიიღო უკრაინის სესხის იჯარის კანონპროექტიც, რომელიც პრეზიდენტ ჯო ბაიდენს საშუალებას მისცემს, უკრაინის ჯარებს იარაღი და სხვა საჭირო მარაგი უფრო ეფექტურად გაუგზავნოს.
კომენტარები