“ჯერ გააუპატიურა, შემდეგ გაგუდა და კლდიდან გადააგდო” – რაში ედება ბრალი კვიპროსში საქართველოს ყოფილ მოქალაქეს

რუსთავი2–ის ინფორმაციით, საქართველოს ყოფილი მოქალაქე სასტიკ დანაშაულშია ბრალდებული – მედიის ცნობით, 28 წლის უკრაინელი ქალი კუნძულ კვიპროსზე მოკლეს. 30 წლის მამაკაცი, რომელიც კვიპროსის წინასწარი დაკავების იზოლატორშია, საქართველოს ყოფილი მოქალაქეა. ადგილობრივი პოლიცია ბრალდებულის ვინაობას არ ასახელებს, თუმცა ცნობილია, რომ მას ბრალი ფემიციდის მუხლით წარუდგინეს.

ექსპერტიზის წინასწარი ვერსიით, ქალი ძალადობის მსხვერპლი გახდა, ის ჯერ გააუპატიურეს, შემდეგ გაგუდეს და კლდიდან გადააგდეს. დაკავებული ირწმუნება, რომ გარდაცვლილი მისი პარტნიორი იყო და კლდიდან შემთხვევით, ფოტოს გადაღების მომენტში გადავარდა. ფაქტს აქტიურად აშუქებს ადგილობრივი მედია. საქმეზე დღეს საგამოძიებო ექსპერიმენტიც ჩატარდა.

ჯერ უცნობია, დაუდასტურდება თუ არა 30 წლის მამაკაცს გაუპატიურებისა და განზრახ მკვლელობის ბრალდება. ექსპერტიზით უკვე დადგენილია, რომ შემთხვევის დროს ის ნარკოტიკებისა და ალკოჰოლის ზემოქმედების ქვეშ იმყოფებოდა. კურიერის ინფორმაციით, მამაკაცმა საქართველო წლების წინ დატოვა და ამჟამად საბერძნეთის პასპორტს ფლობს.