კოვიდსაწინააღმდეგო ვაქცინაციის პროცესში შესაძლოა ბავშვები ჩაერთონ. ინიციატივით ჯანდაცვის მინისტრი ეკატერინე ტიკარაძე მას შემდეგ გამოვიდა, რაც ქვეყანაში, ე.წ. დელტა შტამით ინფიცირების შემთხვევებმა იმატა და მცირეწლოვნებზეც გავრცელდა.
ბავშვების ვაქცინაციის აუცილებლობაზე ალაპარაკდა დაავადებათა კონტროლის ეროვნული ცენტრის ხელმძღვანელიც.
ჯერჯერობით ზუსტი თარიღი როდიდან და რომელი ვაქცინაციით უნდა დაიწყოს ბავშვების აცრა უცნობია.
შეგახსენებთ, ციციშვილის კლინიკაში 3 ახალშობილი კოვიდინფიცირებულია. მათგან ერთს დელტა შტამი, იგივე ინდური ვარიანტი დაუდასტურდა. სამივეს მდგომარეობა სტაბილურად მძიმეა.
თუმცა, მათ დღემდე არ გაუციათ კითხვაზე პასუხი – “რას ვეუბნებით მშობლებს?” – შეგახსენებთ, ეს კითხვა, ზაზა წერეთელმა, “ალიას” მეშვეობით, ჯერ კიდევ მაისის დასაწყისში დასვა, როდესაც, პირველად დაიწყეს ბავშვების აცრაზე საუბარი.
ზაზა წერეთელი, ალია:
რამდენიმე ქვეყანამ მიიღო ეს გადაწყვეტილება – გამომდინარე იქედან, რომ ახალი შტამი უფრო ახალგაზრდებში გვხვდება და ახალი სასწავლო წლის დაწყებისას, ნამდვილად აღარ სურთ ისევ დისტანციურ რეჟიმში გაგრძელდეს სწავლა. სწორედ ამიტომ, რამდენიმე ქვეყანამ გადაწყვიტა არასრულწლოვნებიც აცრას. მე ვთვლი, მაინც კარგი იქნება, ჯერ დავაკვირდეთ, დაველოდოთ მეტ და მეტ კვლევას და მერე გადავწყვიტოთ ასეთი მნიშვნელოვანი საკითხი. საქართველოში ხშირად ვიცით, გავიგონებთ რაღაც გადაწყვეტილების შესახებ რომელიღაც ქვეყანაში, ავიტაცებთ, ოღონდ საინფორმაციო კამპანიასაც არ ვიწყებთ, რომ მოსახლეობა იყოს ინფორმირებული. რას ვეუბნებით მშობელს? – ამერიკამ გადაწყვიტა 12 წლის ბავშვის აცრა და მოდი, შენც აცერი შენი 12 წლის შვილიო? მესმის, რომ ამერიკამ გადაწყვიტა, მერე ჩვენ რაო, გეტყვიან. ეს უნდა იყოს არგუმენტებით გამყარებული. გვიჭირავს ჯერ ხელში მყარი არგუმენტები? დაველოდოთ, ვნახოთ ახალი კვლევების შედეგები და მერე გადავწყვიტოთ, მით უფრო, რომ ჯერ ზრდასრული მოსახლეობაც არ გვყავს აცრილი. იმ ქვეყნებს, ვინც ამაზე მსჯელობს, ზრდასრული მოსახლეობის მეტი წილი ჰყავთ აცრილი. ნაჩქარევი გადაწყვეტილებები არ გვარგებს, პირიქით, ნაჩქარევი გადაწყვეტილებები უფრო აზიანებს პროცესს.
კომენტარები