“ქართული ოცნების” თავმდომარის, ბიძინა ივანიშვილის ოცნებაა, ყოფილ პრეზიდენტთან, მიხეილ სააკაშვილთან ერთი ერთზე დარჩენა, რადგან ოლიგარქმა იცის, როგორ მოუგოს ექსპრეზიდენტს ბრძოლა. ამის შესახებ 2020NEWS”-თან საუბრისას “გირჩის” ერთ-ერთმა ლიდერმა იაგო ხვიჩიამ განაცხადა.
“ჩემი აზრით, ბიძინა ივანიშვილის ოცნებაა, სააკაშვილთან ერთი ერთზე დარჩენა, რადგან მან იცის, როგორ მოუგოს ეს ბრძოლა. ოპოზიცია კი იდეებით მრავალფეროვანი და მათ განსახორციელებლად ერთიანი უნდა იყოს და არა – ერთფეროვანი.
ექსპერტები მართლები არიან იმ თვალსაზრისით, რომ ოპოზიციას გამარჯვებისთვის სჭირდება გაძლიერება. გაძლიერება კი შეიძლება მხოლოდ იდეებით მოხდეს, რადგან 5 თვეში ახალი პოლიტიკოსები ვერ გაჩნდებიან.
იდეების მიმართ ერთგულების სწავლაც რთულია 5 თვეში, თან ისე, რომ ეს დამაჯერებელი იყოს, მაგრამ თუ სათანადო მონდომება იქნება და ოპოზიციას გულწრფელად მოუნდება, წარმოიდგინოს, როგორი იქნება საქართველო მათ ხელში, არსებობს შანსი, ხალხმა ეს დაიჯეროს. მხოლოდ ასე მჯერა ოპოზიციის გამარჯვების”
შეგახსენებთ, საქართველოს ექსპრეზიდენტმა, მიხეილ სააკაშვილმა 2020 წლის არჩევნებში ოპოზიციურ პოლიტიკურ პარტიებს გაერთიანებისა და საერთო სიის შედგენისკენ მოუწოდა.
მისი თქმით, ერთიანი სია პარტიების რეიტინგების მიხედვით უნდა შედგეს. აღნიშნულ წინადადებას ოპოზიციური ფლანგიდან უარყოფითად შეხვდნენ. სააკაშვილის იდეა მათთვის მიუღებელი აღმოჩნდა.
გუშინ, ტელეკომპანია „მთავარის“ ეთერში კი, სააკაშვილმა განაცხადა, რომ „დატოლების დრო არ არის“ და პოლიტიკური თვალსაზრისით, ოპოზიციიდან მას ვერავინ გაუტოლდება.
ასევე აღსანიშნავია, რომ პოლიტიკურ ექსპერტთა გარკვეული ნაწილი აცხადებს, რომ გაერთიანებულ ოპოზიციას არ აქვს “ქართული ოცნების” დამარცხების შესაძლებლობა.
კომენტარები