ფეხბურთელ ვახო ჩარკვიანის მკვლელობის საქმეზე ადვოკატები პროკურატურას მკაცრ მოთხოვნას უყენებენ და საქმის სრულყოფილ გამოძიებას ითხოვენ. უფლებადამცველების განცხადებით, თუ საგამოძიებო უწყება საქმეს სათანადოდ არ გამოიძიებს და პასუხისმგებელი პირების საკითხზე კონკრეტული გადაწყვეტილებები არ იქნება მიღებული 5 ივნისამდე, ისინი შიმშილობას დაიწყებენ.
გაიოზ ჩარკვიანი, მოკლული ფეხბურთელის მამა:
ადვოკატებმა და ადვოკატთა კორპუსის ნაწილმა მივიღეთ გადაწყვეტილება, 5 ივნისს 12 საათზე გენერალურ პროკურატურასთან, თუკი არ იქნება გონივრულ ვადაში გადაწყვეტილება მიღებული, იმიტომ, რომ სასაუბრო ძალიან ბევრია და ფორმატიც, მოგეხსენებათ, ამას ვერ დაიტევს, აქედან გამომდინარე, ვიღებთ რადიკალურ გადაწყვეტილებას და ადვოკატთა კორპუსი დავდგებით საშიმშილოდ.
ზაზა ხატიაშვილი:
ივანიშვილის რეჟიმის დროს დაკანონდა, რომ ავადმყოფ ბავშვს შეიძლება, სამი კვირის განმავლობაში გაუკეთო 1050 ამპულა ნარკოტიკული საშუალება, მათ შორის 570 ფენტანილი, ადამიანი გარდაიცვალოს და არავინ დაჯდეს საბრალდებო სკამზე. ეს არის ივანიშვილის რეჟიმის სავიზიტო ბარათი ყველა ადამიანთან მიმართებაში, რომ დაინერგა მკურნალობის ახალი მეთოდი. აქედან გამომდინარე, ეს უბედურება რომ მთელ საქართველოს არ მოედოს, ჩვენ ვდგავართ გაიოზ ჩარკვიანის გვერდით. 5 ივნისს ადვოკატთა კორპუსის წევრებმა მივიღეთ გადაწყვეტილება, ყოველ დღე ერთი ადამიანი იშიმშილებს, თუ არ ჩატარდება ეფექტური გამოძიება, რაც დადგენილია ევროპის ადამიანის უფლებათა კონვენციით მე-6 და მე-13 მუხლებით.
ადვოკატი, ლაშა ცუცქირიძე:
გამოძიება დასრულებულია, პროკურატურას ყველა მტკიცებულება აქვს და ხელისგულზეა სისხლის სამართლის საქმე. სახეზეა ბრალის წარდგენის სტანდარტი. რატომღაც 5 წლის მანძილზე ჭიანურდება სისხლის სამართლის პასუხისმგებლობის დაყენება კონკრეტული პირის მიმართ. სამწუხაროდ, ძალიან მალე, ხანდამულობის ვადა იწურება, რის შემდეგაც პროკურატურა ვეღარ შესძლებს ბრალის წარდგენას. არ გვინდა ისეთ რეალობაში აღმოვჩნდეთ რომ ოჯახი, რომელსაც შვილი მოუკლეს, აღმოჩნდეს მოტყუებული.
20 წლის ფეხბურთელი ვახტანგ ჩარკვიანი კოვიდ-19-ზე მკურნალობას რესპუბლიკურ საავადმყოფოში გადიოდა და 2021 წლის 10 სექტემბერს გარდაიცვალა. გამოძიება იმავე წლის 15 ოქტომბერს დაზარალებულის ოჯახის მიმართვის საფუძველზე დაიწყო. პასუხისგებაში ექთანი თეა ბეგიაშვილია მიცემული, მას მსჯავრი დოკუმენტების გაყალბებისთვის დაედო და წელიწადნახევრიან საპატიმრო სასჯელს იხდის, გირაო აქვს შეფარდებული თერაპიული განყოფილების ყოფილ უფროსს, ქეთევან ცერცვაძეს, მას ბრალად ედება გულგრილობა, თუმცა დაგეგმილი ამნისტია ეხება.
კომენტარები