ხომ არ ფიქრობთ, რომ ის ადამიანები და ჯგუფები, რომლებმაც 5 ივლისი აღასრულეს, ნაცვლად იმისა, რომ დაგირეგისტრირებინათ, როგორც პოლიტიკური ძალა სისხლის სამართლის პასუხისგებაში უნდა იყვნენ დღეს მიცემულნი – ამის შესახებ ლელოს დეპუტატმა, ანა ნაცვლიშვილმა პარლამენტში მინისტრის საათის ფარგლებში მყოფ იუსტიციის მინისტრს, რატი ბრეგაძეს ჰკითხა და სტრასბურგის სასამართლოს მიერ საქართველოსთვის 2013 წლის 17 მაისის გამო €193 500-ის კომპენსაციის დაწესებასა და 2021 წლის 5 ივლისის შესახებ შეახსენა.
“არაფერი გითქვამთ იმ ძალიან მნიშვნელოვან დავაზე, რომელიც საქართველომ წააგო, თქვენი წინამორბედი [თეა წულუკიანი] იყო მაშინ მინისტრი, ეს არის 17 მაისის საქმე და ძალიან დიდი კომპენსაცია დაეკისრა სახელმწიფოს.
17 მაისის საქმიდან გამომდინარე, ხო არ ფიქრობთ, ხო არ ხედავთ იგივე რისკებს 5 ივლისის საქმესთან დაკავშირებით და ხო არ გინდათ გამოიყენოთ საპარლამენტო ტრიბუნა იმისთვის, რომ შესაბამის უწყებებს თქვენი მოსაზრება გაუზიაროთ, რომ 5 ივლისი ამბავი მაინც გამოიძიონ, რომ იგივე ტიპის ამბავი არ მოხდეს და კიდევ არ წააგოს საქართველომ ძალიან სამარცხვინოდ კიდევ ერთი საერთაშორისო დავა და გადასახადის გადამხდელების ჯიბიდან არ წავიდეს მერე კომპენსაციის თანხები. ამასთან კავშირში, ხო არ ფიქრობთ, რომ ის ადამიანები და ჯგუფები, რომლებმაც 5 ივლისი აღასრულეს, ნაცვლად იმისა, რომ დაგირეგისტრირებინათ, როგორც პოლიტიკური ძალა სისხლის სამართლის პასუხისგებაში უნდა იყვნენ დღეს მიცემულნი”, – კითხა ნაცვლიშვილმა ბრეგაძეს.
კომენტარები