ირანში პოლიციამ კიდევ ერთი მოზარდი მოკლა – მედია

ირანში კიდე ერთი  სკოლის მოსწავლე მოკლეს, – ინფორმაციას BBC ავრცელებს.

გამოცემის ცნობით, 17 წლის აბოლფაზლ ადინეზადემ სკოლა გააცდინა და ანტისამთავრობო აქციაზე წავიდა, თუმცა სახლში აღარ დაბრუნებულა.

ოჯახს მეორე დღეს განათლების სამინისტროდან დაურეკეს და უთხრეს, რომ მათი შვილი განყოფილებიდან წაეყვანათ, იქ მისულებს კი აბოლფაზლი დაღუპული დახვდათ.

ხელისუფლებას ბიჭის გარდაცვალებასთან დაკავშირებით ოფიციალური კომენტარი არ გაუკეთებია, თუმცა BBC-მ მოიპოვა მისი გარდაცვალების მოწმობა, სადაც წერია, რომ არასრულწლოვანი ღვიძლისა და თირკმელების დაზიანების შედეგად გარდაიცვალა, რომელიც გამოწვეული იყო ახლო მანძილიდან საფანტის იარაღის სროლით.

“რა დანაშაული ჩაიდინა, რომ მუცელში 24 საფანტი ესროლეთ?” — კითხულობდა მამა შვილის დაკრძალვაზე

შეგახსენებთ, რომ  ირანში  16 წლის გოგო ცემით მოკლეს მას შემდეგ, რაც უარი თქვა რეჟიმის მადიდებელი ჰიმნის სიმღერაზე

მასობრივი საპროტესტო გამოსვლები და დემონსტრაციები 22 წლის ქალის, მაჰსა ამინის გარდაცვალებას მოჰყვა. ამინი, რომელიც “მორალის პოლიციამ” ჰიჯაბის ტარების წესის დარღვევის გამო დააკავა, კლინიკაში მოხვდა და გარდაიცვალა. მას სასტიკად სწორედ ირანელი სამართალდამცველები გაუსწორდნენ.