“ირანში ხალხის წინააღმდეგ სნაიპერებსაც კი იყენებენ” – კობერიძე

საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე::

ირანის ქუჩებში ახლა 2 მილიონამდე ადამიანია გამოსული და უკიდურეს ტირანულ რეჟიმს ებრძვის, რომელიც ხალხი ხოცვაზეა გადასული. 31 პროვინციის 180 დასახლებაში შეტაკებები მიმდინარეობს. დაღუპულთა რაოდენობა 200 ადამიანამდეა. შეიძლება იყოს მეტიც – რიცხვების უმრავლესობა ბუნდოვანია.

რეჟიმმა ისლამური რევოლუციის მცველთა კორპუსისა და მის ქვეშ დაქვემდებარებულ ბასიჯის ძალებს ხალხის წინააღმდეგ სრული ძალის გამოყენებას მწვანე შუქი აუნთო. აპირებენ ჯარის გამოყენებასაც, რომლის მიმართაც რეჟიმს აქამდე მცირე ნდობა ჰქონდა, მაგრამ ახლა სიტუაცია კრიტიკულია მათთვის. რეალურად რას იზამს ჯარი ამას ვიხილავთ.

ხალხის წინააღმდეგ სნაიპერებსაც კი იყენებენ. დაკავებულ დემონსტრანტებს ასახიჩრებენ და კლავენ. ქვეყანაში ინტერნეტი აღარ მუშაობს. ხალხის სასარგებლოდ საუბარია სტარლინკის მიმღები აპარატების ფარულ შეტანაზე.

დემონსტრანტებმა იციან, რომ თუკი რეჟიმი დარჩება მათ მაინც სასიკვდილოდ გაუსწორდება, ასე რომ დასაკარგი ცოტაღაა. მნიშვნელოვანია მიეხმარება თუ არა ისრაელი ან აშშ თავისუფლებისათვის მებრძოლ ხალხს. ამის საპირისპიროდ, ჩინეთი და რუსეთი ღიად უჭერს ისლამურ, არაჰუმანურ რეჟიმს მხარს. იმ ფონზე, რომ დასავლეთ სასაზღვრო რაიონებში ქაოსი მაქსიმალურად დიდია, არ არის გამორიცხული ხალხისთვის ფარული დახმარება გარედან შევიდეს.

ისლამური რეჟიმი, რომელიც ხალხს გაჭირვებაში ამყოფებს და წყალს ვერ აწვდის, იმისთვის კი ნამდვილად პოულობს ხოლმე ფულს, რომ ტერორისტული ქსელი დააფინანსოს ლიბანში, იემენსა და ერაყში.