ბლოგერი, ლევან ყურაშვილი:
“რა ვიცით:
წუხელ, მთელი ღამის განმავლობაში მიმდინარეობდა ტოკმაკი-ვასილივკის ხაზის მასიური საარტილერიო დამუშავება, ზაპორიჟიაში. რუსები ამბობენ, წინა ხაზზე ჩვენს საცეცხლე პოზიციებს ჰაიმარსებითაც კი ბომბავდნენო (შიშს დიდი თვალები აქვს, ამიტომ ძალიანაც ნუ ვენდობით ამ ინფორმაციას). ასევე რუსებისვე ინფორმაციით, ორჯერ იყო ჯავშანსატანკო შეტევის მცდელობა. როგორც თავად ამბობენ, რაღაც პოზიციები დაიკავეს, მაგრამ ფრონტის ხაზის გარღვევა ვერ შეძლესო (ამ ინფორმაციასაც ნუ ვენდობით ბოლომდე).მასიური საარტილერიო ცეცხლი როგორც წესი გამოიყენება შეტევის დაწყების წინ. უბრალოდ პოზიციების დასაწიოკებლად არ იყენებენ, ჭურვების დეფიციტის გამო.
რა არ ვიცით:
ტოკმაკი-ვასილივკის ხაზზე მასირებული ცეცხლი და შეტევის მცდელობა არის ცრუ მანევრი, დამხმარე შეტევა, თუ შეტევის ძირითადი მიმართულება (არც უნდა ვიცოდეთ). რა ძალებით უტევდნენ უკრაინელები და რეალურად იყო თუ არა გარღვევის მცდელობა.რას არ უნდა ველოდოთ:
ხარკოვის ოპერაციასავით, სწრაფ გარღვევასა და ერთ კვირაში რამდენიმე მნიშვნელოვანი დასახლებული პუნქტის გათავისუფლებას.თეორიულად მსგავსი რამ შესაძლებელია, თუმცა ნაკლებად სავარაუდო და შესაძლოა მოხდეს მხოლოდ ერთ შემთხვევაში: თუკი რუსები ფრონტის ხაზიდან მასობრივად და პანიკურად გაიქცევიან. როგორც ვთქვი, ეს ნაკლებად მოსალოდნელი სცენარია.
ხარკოვში რუსებს ჰქონდათ ცოცხალი ძალის მწვავე დეფიციტი, არ არსებობდა თავდაცვის მეორე და მესამე ზოლი, არ არსებობდა მობილური დანაყოფები, რომლებიც გარღვევაზე წასულ უკრაინულ ნაწილებს შეაჩერებდა.
ახლა რუსებს აქვთ თავდაცვის სამი ზოლი, დანაღმული ველები, საინჟინრო ნაგებობები, საცეცხლე წერტილები და უკრაინელების შესაჩერებლად, ზურგში მობილური ნაწილები.
რას უნდა ველოდოთ:
უახლოეს დღეებში და შესაძლოა საათებშიც კი, ტოკმაკის მსგავს ოპერაციას რამდენიმე მიმართულებაზე.უკრაინელების მიზანია ფრონტის ხაზის მაქსიმალურად გაწელვა, რუსების ძალების მაქსიმალურად დაქსაქსვა და მოწინააღმდეგის დაბნევა.
იქნება ცრუ მანევრები (შესაძლოა, ტოკმაკის წუხანდელი ოპერაცია იყოს სწორედ ასეთი), იქნება დამხმარე მიმართულებები და იქნება ძირითადი შეტევა.
თეორიულად ისიც შესაძლებელია, რომ ამწუთას შეტევის ძირითადი მიმართულება განსაზღვრული არც იყოს და სადაც რუსები გაირღვევიან, ძირითადი ნაწილები იქ გადაისროლონ.
დროში გაწელილ ოპერაციას, რომელიც შესაძლოა გაგრძელდეს რამდენიმე თვე. კარგად ჩასანგრებული მოწინააღმდეგის პოზიციებიდან ამოყრა ძალიან რთულია. იქნება დანაკარგები. სამწუხაროდ, იქნება ბევრი დაღუპული უკრაინელი, იქნება ბევრი აფეთქებული და დაზიანებული ტექნიკა. მათ შორის, ამერიკული ბრედლებიცა და გერმანული ლეოპარდებიც.მოემზადეთ ამისთვის ფსიქოლოგიურად. არ იქნება უცებ შევუტიე, რუსები გაიქცნენ, რამდენიმე კაცი მომიკვდა და ორი ცალი ჰამერი აფეთქდა.
რაც მთავარია, ინიციატივა არის უკრაინელების ხელში. ისინი ირჩევენ სად, როდის და რა ძალებით შეუტიონ. რაც ომში გადამწყვეტი უპირატესობაა.
იქნება მძიმე ბრძოლები, იქნება დანაკარგები, მაგრამ შედეგი იქნება გათავისუფლებული უკრაინული მიწა და უკრაინელები.”
კომენტარები