იყო თუ არა თვითმკვლელობა? – რას აცხადებს ვაკე-საბურთალოს მთავარი სამმართველოს უფროსი ილია ელოშვილის გარდაცვალებაზე

ვაკე-საბურთალოს მთავარი სამმართველოს უფროსმა, ავთანდილ გალდავამ  ჟურნალისტებს ელოშვილის სახლთან განუცხადა, რომ თბილისის მერის მოადგილე ილია ელოშვილი სუიციდის შედეგად არის გარდაცვლილი.

 ექსპერტ-კრიმინალისტები საგამოძიებო მოქმედებებს ადგილზე კვლავ აგრძელებენ.

„დანაშაულის ნიშნები არ არის, სუიციდთან გვაქვს საქმე“, – აცხადებს ავთანდილ გალდავა.

თბილისის მერის მოადგილის ილია ელოშვილის გარდაცვალების ფაქტთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

ადგილზე ექსპერტ-კრიმინალისტები მუშაობენ. ცხედარი ექსპერტიზის ბიუროში გადაასვენეს.

ჩვენი ინფორმაციით, ელოშვილს ცეცხლსასროლი იარაღით მიყენებული ჭრილობები აღენიშნება.

შეგახსენებთ, ილია ელოშვილი თბილისის მერის მოადგილის თანამდებობას 2017 წლიდან იკავებდა.  2012-2016 წლებში იყო საქართველოს ენერგეტიკის მინისტრის მოადგილე, 2017 წელს კი საქართველოს ენერგეტიკის მინისტრის თანამდებობას იკავებდა. მანამდე, სხვადასხვა წლებში მუშაობდა კერძო სექტორში ხელმძღვანელ თანამდებობებზე, ასევე „ათასწლეულის გამოწვევის“ ფონდისა და USAID-ის პროექტებში.

ილია ელოშვილს მეუღლე და ორი მცირეწლოვანი შვილი დარჩა.