“იმედია “მომაკვდავი” შვილის თემაზე დისკუსიებს ავცდები” – ქართველიშვილი

მოძრაობის “ხალხის ძალა” წევრი, დავით ქართველიშვილი:

“იმედია “მომაკვდავი” შვილის თემაზე დისკუსიებს ავცდები. უბრალო კითხვა მინდა დავსვა: 15 თვის განმავლობაში “უკურნებელად დასნეულებული” და “მომაკვდავი” სააკაშვილის სახელზე ერთხელ მაინც თუ შეუკვეთეს ეკლესიაში საჯანმრთელო სავედრებელი პარაკლისი? ვივარაუდოთ – რომ არც ერთხელ. ვინაიდან არ მინდა დავიჯერო, რომ თავის ადამიანურ სიმულაციაში და თაღლითობაში – სააკაშვილის ახლობლებს განზრახვა ჰქონოდათ შეგნებულად ჩაერთოთ უზენაესი გამჩენიც.

როდესაც ვინმე გამიზნულად განიზრახავს ეკლესიაში ცოცხალ ადამიანზე შეუკვეთოს პანაშვიდი – ეს არის მკრეხელობა და სატანიზმი. როდესაც არა “უკურნებელად დასნეულებულს” და არა “მომაკვდავს” შეუკვეთავ საჯანმრთელო სავედრებელ პარაკლისს – ეს არის მკრეხელობა და სატანიზმი. ამიტომ პატიმარ სააკაშვილის გულშემატკივრებისთვის მაქვს სამი პოზიტიური გზავნილი: ის არაა სატანისტი, ის არაა უკურნებელად ავად და ის არ კვდება.”