“იმ მომენტში ყველა უნდა იყოს მზად” – ვახო სანაია

ოპოზიცია ცუდ ფორმაშია. უფრო სუსტია, ვიდრე რამდენიმე წლის წინ იყო. ამას ბევრი მიზეზი აქვს – ობიექტურიც და სუბიექტურიც.

პოლიტიკურ სპექტრს სერიოზულად უდგას უნდობლობის საკითხი.

ხშირად მომისმენია, კიდევ რა უნდა მოხდეს, რომ ქუჩაში გავიდეთო. აქ იგულისხმება ფართომასშტაბიანი აქციები.

ზემოთაც დავწერე და კიდევ გავიმეორებ – დღეს პოლიტიკურ სპექტრს არ შეუძლია პროცესების თავისი ძალებით დაწყება. ეს ფაქტია. მუხტი კი ხელოვნურად არ იქმნება.

ჩემი აზრით, ქუჩაში პროცესის გადატანა შეუძლია მოვლენას, რომელიც მასობრივ უკმაყოფილებას გამოიწვევს. ხალხი გაყვება მოვლენას და არა რომელიმე პარტიულ ლიდერს. მოვლენა კი სპონტანურად თავად შობს ახალ ლიდერებს ან პარტიები დახვდებიან უკეთეს ფორმაში ამგვარ პროტესტს. შანსი არ არსებობს რომელიმე პოლიტიკოსის დაძახებულზე მასობრივი პროტესტი მივიღოთ, რადგან არც მაღალი პერსონალური ნდობა არსებობს. მუხტი ბუნებრივი უნდა იყოს.

იკითხავთ, კი მაგრამ რა უნდა გაკეთდეს ?

მნიშვნელოვანია, პოლიტიკურმა პარტიებმა თუ საზოგადოებრივმა ჯგუფებმა ის სიმძიმე აწიონ, რისი ზიდვაც შეუძლიათ. ეს უნდა აკეთონ ხშირად – პოლიტიკურ თუ სოციალურ საკითხებზე. იმ მასშტაბით, რასაც გაქაჩავენ.

მაგალითად, უაღრესად მნიშვნელოვანია ის პროტესტი, რომელსაც ახლა პარლამენტში ვხედავთ – სამოქალაქო საზოგადოების მწვავე რეაგირება ხელისუფლების რუსული კურსის წინააღმდეგ.

მსგავს აქტიურობას უნდა მიმართონ პარტიებმაც და საზოგადოებრივმა ჯგუფებმა. ვიმეორებ – იმ მასშტაბით, რისი აწევაც შეუძლიათ და არა გადაჭარბებული დაპირებებითა და მოლოდინით, რაც შემდეგ ხალხს უიმედობაში გადააგდებს.

საბოლოო ჯამში ყველანაირი პროტესტი თავს მოიყრის ერთ წერტილში, როცა გადამწყვეტი მომენტი დადგება. სწორედ აქ იტყვის ხალხი თავის სიტყვას. იმ გადამწყვეტ მომენტში მასობრივი პროტესტიც იქნება – ბუნებრივი და მუხტის მატარებელიც. აი, სწორედ მაშინ გადაწყდება, ივანიშვილი მოიგებს თუ ხალხი. იმ მომენტში ყველა უნდა იყოს მზად – პოლიტიკური სპექტრი, სამოქალაქო სექტორი და მთლიანად ხალხი.

ასე მოქმედება მგონია სწორი.

რაც შეეხება იმას, როდის დადგება ეს გადამწყვეტი მომენტი. პროგნოზს ვერ გავაკეთებ – ხვალ, ზეგ, რამდენიმე თვეში თუ როდის. ამას ახლა ვერავინ იტყვის. წინასწარმეტყველი არავინაა. ამ მომენტს მივხვდებით და ვიგრძნობთ. რაც ახლა გასაკეთებელია, უკვე დავწერე – მოქმედება, მოძრაობა და იმ მასშტაბის ტვირთის აწევა, ვის როგორც შეუძლია. ბოლოს ეს ყველაფერი ერთ წერტილში შეერთდება.”