“იარაღი იყიდა, მოკლა, გაიქცა, მტკიცებელებები გადამალა – სად არის აქ აფეტი ან შეურაცხადობა?” – კესარიას მეგობრები და ახლობლები

კესარია აბრამიძის ოჯახის მეგობრებსა და ახლობლებს ბექა ჯაიანის შეურაცხადობისა და აფექტის არ სჯერათ და აცხადებენ, რომ ოჯახის პოზიციაც ასეთივეა.

არსებობენ მოწმეები, რომლებიც ადასტურებენ, რომ ამ საბედისწერო შემთხვევამდე არაერთხელ ყოფილა კონფლიქტი მათ შორის, რისი მიზეზიც იყო კესარიას ორიენტაციაზე მითითება ბრალდებულის მხირდან. ფაქტია ერთი, რომ პირმა განიზრახა დანაშაულის ჩადენა, მკვლელობა, შეიძინა დანაშაულის იარაღი, ავიდა, სისრულეში მოიყვანა მისი განზრახვა, განსაკუთრებული სისასტიკით, გენდერული შეუწყნარებლობის მოტივით ადამიანი გამოასალმა სიცოცხლეს, გაიქცა, გადამალა მტკიცებულებები, გაანადგურა მტკიცებულება – ტანსაცმელი და სცადა დაეტოვებინა ქვეყნის საზღვარი. სად არის აქ აფექტი ან შეურაცხადობა. ოჯახი არც კი განიხილავს ვადიან თავისუფლების აღკვეთას. ოჯახის მოთხოვნაა, რომ აღნიშნული პირის მიმართ დადგეს გამამტყუნებელი განაჩენი და სასჯელის ზომად და სახედ განესაზღვროს თავისუფლების უვადო აღკვეთა”, – ამბობს ოჯახის ახლობელი.

იმ შემთხვევაში, თუ მკვლელობისთვის დაკავებული ბექა ჯაიანი ციხის ნაცვლად ფსიქიატრიულ კლინიკაში გაუშვეს, ტრანსგენდერი ქალის ახლობლები ბოლომდე ბრძოლას აანონსებენ.

დარტყმა იყო, ძალადობა იყო, ბულიგი, დამცირება იყო, ანუ ბრალდებულს ჰქონდა მანამდედაც მცდელობები, რომ გარდაცვლილი მაქსიმალურად დაემცირებინა. თუ ეს მოხდა, ამას აუცილებლად გავასაჩივრებთ და ასე არ დავტოვებთ. 100%-ით წინააღმდეგნი ვართ ბრალდებულსი ხონის ფსიქიატრიულში წაყვანის”, – ამბობს კესარიას მეგობარი. 

კესარია აბრამიძის მკვლელობაში ბრალდებულს ფსიქიატრიულ-ფსიქოლოგიური ექსპერტიზა დაენიშნა. 26 წლის ბექა ჯაიანის ლევან სამხარაულის სახელობის სასამართლო ექსპერტიზის ეროვნულ ბიუროში მოთავსების შესახებ თბილისის საქალაქო სასამართლოს დღეს შუამდგომლობით პროკურატურამ მიმართა.

თუ დადგინდება, რომ დანაშაულის ჩადენის მომენტში ბექა ჯაიანი შეურაცხადი იყო, მაშინ არ არის გამორიცხული, რომ ის ციხის ნაცვლად, კლინიკაში გაუშვან.

კესარია აბრამიძის მკვლელობის საქმეზე წინასასამართლო სხდომა 7 ნოემბერს არის ჩანიშნული და როგორც დღეს ბექა ჯაიანის უფლებადამცველმა დააანონსა, ბრალდებული სწორედ შემდეგ სასამართლო სხდომაზე დაარღვევს დუმილს, თუმცა, ადვოკატს არ უთქვამს, იმ შემთხვევაში, თუ შეურაცხადობა დადასტურდება, რა სამართლებრივი აზრი ექნება ბრალდებულის დუმილის დარღვევას.