საქართველოს მთავრობის ინფორმაციით, წყალმომმარაგებელი კომპანიის „ჯორჯიან უოთერ ენდ პაუერის“ 80%-იანი წილი ესპანურ კომპანიაზე გაიყიდა.
180 მილიონი აშშ დოლარის ინვესტიცია მნიშვნელოვნად შეუწყობს ხელს საქართველოს წყალმომარაგების სექტორს და მენეჯმენტის ხარისხობრივ განვითარებას, – ამის შესახებ საქართველოს პრემიერ-მინისტრმა, ირაკლი ღარიბაშვილმა „აქუალიას“ აღმასრულებელ დირექტორ ფელიქს პარა მედიავილასა და „საქართველოს კაპიტალის“ გენერალურ დირექტორ ირაკლი გილაურთან ონლაინშეხვედრაზე განაცხადა.
მთავრობის მეთაურმა ინვესტორებს ნდობისთვის მადლობა გადაუხადა.
პრემიერ-მინისტრის პრესსამსახურის ინფორმაციით, საინვესტიციო კომპანია „საქართველოს კაპიტალის“ შვილობილი კომპანიის, Georgia Global Utilities-ს (GGU) სტრატეგიული ინვესტორი და პარტნიორი, მსოფლიოში წამყვანი ესპანური კომპანია „აქუალია“ (Aqualia) ოფიციალურად გახდა. „აქუალიამ“ 180 მილიონი აშშ დოლარის მოცულობის ინვესტიცია განახორციელა, რის სანაცვლოდაც შეიძინა კომპანია „ჯორჯიან ვოთერ ენდ ფაუერის“ (Georgian Water and Power) 80-პროცენტიანი წილი. დანარჩენი 20-პროცენტიანი წილის ფლობას კვლავ „საქართველოს კაპიტალი“ განაგრძობს.
„ონლაინშეხვედრაზე ხაზი გაესვა ესპანეთსა და საქართველოს შორის არსებულ მჭიდრო ურთიერთობებს. ირაკლი ღარიბაშვილის თქმით, საქართველო სანდო და სტაბილური ბიზნესპარტნიორია.
პრემიერ-მინისტრმა აღნიშნა, რომ 2021 წლის საქართველოს ეკონომიკის ზრდის ტემპი 10.6 პროცენტი იყო. მისი თქმით, საქართველომ ბოლო ათწლეულის განმავლობაში მნიშვნელოვანი ტრანსფორმაცია განიცადა და მსოფლიოში ერთ-ერთი ყველაზე დაბალი საგადასახადო განაკვეთით და სახელმწიფო სერვისების ხელმისაწვდომობით სწრაფად მიიწევდა უფრო ლიბერალური და თავისუფალი საბაზრო ეკონომიკისკენ.
კომენტარები