“გუშინ 26 წლის რუსი ქალი გავიცანი, თავიდან 18 წლის მეგონა…” – რას წერს ალეკო შუღლაძე

იცით საიდან არის გამოქცეული? ჩუკოტკიდან. პუტინის რეჟიმს გამოექცა. რამდენიმე ჩემი მეგობარი დაიჭირეს, სადღაც გადაკარგეს, ერთი უგზო-უკვლოდ დაიკარგა, ერთსაც მაგადანში უკრეს თავიო. (მაგადანში!) ეს ქალი ახლობელს გაუფრთხილებია და დროზე გამოქცეულა.

არავითარი ბიზნესი არ აქვს, უფულოდ არის, აქ შეიკედლეს. ავტობუსით ვიმგზავრეთ, აღშფოთებული იყო: იქ ჩუკოტკაზე ადამიანთა მხოლოდ 1 პროცენტი ეწინააღმდეგება პუტინს, დანარჩენები მონები არიანო. ისე ემოციურად გაყვიროდა, მთელი ავტობუსი დააფრთხო. აქაც არიან პუტინისტები-მეთქი და ვიციო.

ჩუკოტკაზე სულ თეთრი ღამეებია, მზე წესიერად ვერც ამოდის, ასე ჰორიზონტზე მოძრაობს და მალევე ჩადის, ხალხი გამოათაყვანა სიბნელემ და გაუგებარმა თეთრმა ღამეებმა, სულ სმაში არიან, ბოსტნეული არ ვიცით რა არის, ჩინური პლასტმასა შემოაქვთ და იმას ვჭამთო. აღარ შემიძლია, ვეღარ დავბრუნდებიო. იქიდან საფრანგეთში გამოვიქეცი, მაგრამ რუსული პასპორტი მქონდა და არ მიმიღესო. არავინ მიღებს, მხოლოდ აქ შევძელი ჩამოსვლა, გაგეცინება და აქედან უკრაინაში მივდივარ, უკრაინა თუ მიმიღებს, თანაც იქ შეყვარებული მყავსო. ძალიან გონიერი ვინმე ჩანდა, ლაპარაკში გამოჩნდა. საბჭოთა კავშირის ისტორიაც კი იცოდა თავისი უცნაური დეტალებით. მე ვეხუმრებოდი და ნელ-ნელა გაიღიმა, ბოლოსკენ გავაცინე კიდეც.

მედალს მართლა ორი მხარე აქვს. ყურადღებით ვიყოთ თითოეული ადამიანისადმი.”